o mirandês de luto MANUELA BARROS FERREIRA

Cun 84 anhos, morriu-se hoije la Doutora Manuela Barros Ferreira.

Ye la tie a quien mais debemos l mirandés moderno.

Tube la felcidade de trabalhar cun eilha ne l grupo de çcuçon de la Purmeira Adenda a la Cumbençon.

Fui cordenadora científica de la Cumbeçon Ourtográfica de la Lhéngua Mirandesa i dedicou buona parte de la sue bida al studo, defénsia i dibulgaçon de la Lhéngua Mirandesa.

Cunjuntamente cul sou home, l storiador Cláudio Torres, fui ua mulhier que tube ua bida dura, mas cheníssima.

Ye ua grande proula haber comido tabafeias cun eilha an mie casa i poder star antre las pessonas a quien eilha trataba por amigo. Anquanto you biba i anquanto tenga mimória, nunca esta tie salirá de las mies buonas lhembrácias. Fui ua pessona buona, ua mulhier dua anteligença superior, ua sábia, dun sentido de l humor mui alto, dua senseblidade mui grande i screbie cumo ua Diusa.

Deixo ls mais sinceros sentimientos a la família.

Que la tierra le seia lhebe.

Bien haiades caríssima Manuela.

“You falo cumo bós, mas bós nun falais cumo you”