TIMOR LIDERANÇA NOVA?

Iha tinan 2016, hau ho kolega Americano mas decendente Mexicano ida tur iha Cafetaria escola dada lia. Loron nee, importante tebes ba povo Americano tamba iha loron nee sira nia loron votasaun presidential. Iha momento neba, sira iha candidato forte nain rua, ferik Hillary Clinton e Katuas Donald Trump. Kolega nee suporta makaas ferik Hilary tamba nia fiar ferik Hilarry mak representa seda mak nia fiar. Tamba ema hotu ba vota, hau husu see nia vota ona. Nia hatan dehan “hau baruk ba vota, tamba hau ba vota mos hanesan deit, sei la halo diferensa.”

Liu loron hira, resultado eleisaun sai. Americano barak mak fiar katak ferik Hillary sei manan, incluido hau nia profesora. Nia sosa champanha preparado atu loke ho nia familia celebra Hillary nia vitoria (tamba see mak nia manan, nia mak feto dala’uluk preseindente Americano). Maibe to besik rai nakaras, resultado sai oinseluk. Katuas Trump manan liu husi sistema demokrasia nasaun nian. Resultado nee Xoque ema barak incluido hau nia profesora. Champanha nee nia la too de loke.

Rajaun hau konta estoria nee tamba hau rona jovem barak dehan “hau baruk mete politika” (jovem nee incluido hau). Hanesan jovem, hau sente mete politika nee hanesan mete problema. Mas agora, hau loke hau nia matan katak, importante atu mete vida politika tamba ita nia futuru iha politikus sira nia liman. Volante nasaun tuir lo’los ita povo mak kaer. Mas atu kaer volante nee, ita tenke matenek uja ita nia lian (votos).

See ita la mete politika, ita husik volante nasaun ba politikus sira nia liman. Desemprego aas, mal nutrisaun makaas, korupsaun sae, oportunidade la iha, etc.

See mak ita atu fo sala? See ita rasik mak hili sira.

Hau hare kandidatura presidente komesa mosu ona barak-barak. Hau mos hare feto nia participasaun iha politika komesa makas.

Hanesan jovem feto, hau nia mehi atu bele iha “role model” feto ida nebe hau bele hateke ba. Hau desde uluk kedas sempre hateke ba mana Milena Pires hanesan hau nia “role model”. Espero katak mana Milena Pires bele iha interese atu kandidata aan tamba hau fiar jovem barak mak hamlaha ba lideransa Feto nebe mak matenek, brani, karismatika, e sempre tau interese povo e nasaun iha oin.