timor agora 15.4.18

TIMOR AGORA

Fretilin sei garante subsidiu ba ferik-katuas
AP-RI UNITAL Realiza Judísiu Da-Lima
Iha Lei Prosesa Koruptor, Kriminozu Balu Tama Ona Kadeia
PM-MDS Tuir Kampana Sem Karta Lisensa

Fretilin sei garante subsidiu ba ferik-katuas

Posted: 14 Apr 2018 01:25 AM PDT

Partidu Fretilin sei garante subsidiu ba ferik no katuas sira ho dignidade, wainhira povu fo fiar kaer ukun.

“Ba ferik ho katuas ne’ebe tinan hira ona simu osan subsidiu $30,00 fulan ida, hau la gosta promete, hau dehan bainhira dezenvolvimentu lao ferik katuas sira sei hetan subsidiu ida ho dignidade,”dehan sekretariu jeral partidu Fretilin, Kuarta (11/4) iha kampnha eleitoral ba loron rua ho tipu dialogu iha Aimutin-Comoro.

Partidu Fretilin mos sei kontinua bolsa da mãe, atu kria kondisaun diak, nune’e inan sira bele kore sira nia an, uza osan ida ne’ebe kiik hodi sustenta uma laran.

Iha parte seluk, Fretilin sei loke investimentu barak, hodi loke kampu servisu ba joven sira, atu sira labele sai dezempregu iha rain rasik.

Nune’e mos defende direitu difisiente, tanba difisiente laos invalidu, difisiente iha valor, iha kapasidade no iha kompetensia, tanba ne’e labele nega direitu ba difisiente sira.

Fretilin mos sei garante igualdade jeneru, mane ka feto iha direitu hanesan ita lalika hare ba sira nia orientasaun seksu no sira nia vida, direitu hanesan deit.

Ikus liu nia dehan, atu dezenvolvimentu lao buat ida mak importante mak jestaun ba rekursus tenki lolos, hahu husi rekursu humanus, labele fo servisu ba familia deit, maibe tuir nia meritu duni hodi servi povu.

Iha biban ne’e, fundador Fretilin José Ramos Horta dehan mudansa ba progresu ne’e, Governu Fretilin mak bele halo, tanba lideransa Fretilin Mari Alkatiri ema jestor ida ne’ebe kualidade.

Timor-Leste nia politika fiskal diak liu sira iha mundu, tanba ita iha ekonomista ida ne’ebe la gosta atu gasta osan arbiru.

“Dr. Mari Alkatiri ema ida poupa osan. Hau preukupadu ho rai ne’e ninia moris iha futuru. Governu Fretilin nian iha tinan lima mai tenki halo jestaun, labele gasta osan demais, jare tau osan liu ba edukasaun no saúde no bee mos. Tinan 10 liu tiha labarik kikoan sira sei moras nafatin tanba bee mos laiha,” dehan Horta.

Partisipa kampanha ne’e, mai husi lideransa maximu ho kuadrus politiku Fretilin, no militante no simpatizante sira.

Kampanha ne’e, hetan observasaun husi membru komisaun nasional da eleisaun, observador internasional no nasional no hetan seguransa maximu husi Polisia Nasional Timor-Leste (PNTL)

Kampanha eleitoral sei remata iha loron 9 fulan Maiu no eleisaun entesipada sei hala’o iha loron 12 fulan Maiu.mra

GMN TV | Grupo Média Nacional

AP-RI UNITAL Realiza Judísiu Da-Lima

Posted: 14 Apr 2018 12:30 AM PDT

DILI, (TATOLI) – Universidade Orientál Timor Lorosa’e (UNITAL), Fakuldade Siénsia Sosiál no Polítika (CISPOL-sigla portugés), liuhusi despaxu dekanu númeru 05/FCP/VA/IV/2018 realiza judísiu da-lima ba judisiáriu 39 husi departamentu Administrasaun Públika (AP) no 14 husi Relasaun Internasionál (RI).

Dekanu CISPOL, Álvaro da Silva, hateten ba judisiáriu sira katak judísiu nu’udar indikidaór ida, estudante sira remata sira-nia lisensiatura no iha direitu tomak nu’udar lisensiadu hodi uza títulu lisensiatura no la’ós ona nu’udar estudante maibé tama ona iha sosiedade intelektuál.

“Reprezenta UNITAL hato’o parabéns ba judisiáriu sira hotu maske iha difikuldade iha sikun balun maibé ita-boot sira konsege termina estudu iha tempu determinadu”, kongratula dekanu Álvaro perante judisiáriu na’in 53 inklui inan-aman no família iha kampus UNITAL, Bekora, ohin.

Nia mós fó mensajen ba judisiáriu sira katak títulu akadémiku ne’ebé hetan ona nu’udar bukae hodi forma mentalidade no umanu ne’ebé iha integridade hodi kompete iha mundu ne’ebé nakonu ho kompetisaun.

“Haree tulun ita-nia sosiedade, valór sei hatudu liuhusi ita-boot sira-nia prestasaun ba nasaun, sosiedade mak sei justifika ita-boot sira-nia kualidade”, dekanu Álvaro da Silva fó mensajen.

Nune’e mós, dekanu husu ba judisiáriu sira ne’e atu estuda no aprende nafatin iha ne’ebé de’it no bainhira de’it. Bainhira hasoru problema iha família, sosiedade no nasaun prontu solusiona. Ne’e prosesu aprendijazen, hodi ita susesu, agora no iha futuru.

“Hatudu nafatin mentalidade hanesan intelektuál no prontu atu servi sosiedade ne’ebé la hetan oportunidade”, akadémiku UNITAL ne’e husu tan.

Judísiu ba departemntu rua, iha UNITAL, ohin loloos kompostu husi judisiáriu na’in 58, maibé na’in haat husi departamentu AP la konsege tuir tanba sei iha faze revizaun ba traballu akadémiku no na’in ida husi RI ho razaun ne’ebé hanesan. “Sei halo revizaun, tanba haree ne’e kualidade ensinu, la’ós kuantidade”, subliña dekanu Álvaro.

Reprezentante judisiáriu sira, Domingas Alves da Silva, hodi família no judisiáriu sira tomak hato’o agradesimentu ba reitória UNITAL ho estrutura makro no mikro tomak tan apoiu, halo akompañamentu no esforsu tomak liuhusi materiál no naun-materiál hodi prepara bukae ida ba sira-nia futuru.

“Dezenvolvimentu Timor-Leste la’ós governu ka estadu de’it maibé timoroan hotu nia dever”, akresenta reprezentante ho valór finál 3,69 ne’e.

Nune’e mós, hodi judisiáriu sira hato’o deskulpa autoridade akadémika, liliu dosente sira, karik iha prosesu aprendizajen sira, karik hatudu ona hahalok indisiplinár balun.

Atividade judísiu UNITAL, Fakuldade CISPOL ba da-lima ne’e, alende bazea ba despasu dekanu nian, haktuir mós ba despaxu reitór nú. 02/I/2018.

Inklui baze fundamentál, konstituisaun Repúblika Demokrátika Timor-Leste (RDTL), artigu 59o (edukasaun no kultura) nomós lei baze Ministériu Edukasaun (ME), nú. 03/6/MN/I/2014 inklui estatutu UNITAL nian.

Jornalista: Rafy Belo | Editora: Rita Almeida

Iha Lei Prosesa Koruptor, Kriminozu Balu Tama Ona Kadeia

Posted: 14 Apr 2018 12:03 AM PDT
DILI – Sosiedade sira preokupa ho lei anti korupsaun, tanba sira sente katak lei nee laiha ona, maibe lei nee lao hela, mak agora dadaun lori ona kriminozu balu ba hatama iha prizaun, no balu nian prosesu sei lao hela iha tribunal.

“Responde ba lei anti korupsaun, se ita la iha lei anti korupsaun, ita labele prosesa kriminozu sira neebe halo korupsaun, balu tama ona iha kadeia, balu prosesu hela iha tribunal, nee hatudu ita iha lei atu halo prosesu ba korupsaun nian,” hateten Deputadu Parlamentu Nasional, Arao Noe ba Jornalista sira iha Timor Plaza, bainhira partisipa iha debate importansia projetu anti korupsaun Kinta, (12/04/2018).

Arao hatutan, KAK nee simplesmente polisia investigasaun criminal sira halo investigasaun deit, ba iha area korupsaun, maibe problema nain lolos nee mak Ministeriu Publiku.

Iha fatin hanesan Diretor JSMP, Luis De Oliveira Sampaio hateten, agora dadaun ema hotu ezize konaba lei anti korupsaun, tanba nee partidu politikus neebe hetan asentu iha parlamentu, presija haree ba asuntu nee.

Notisia kompletu lee ihajornal STL edisaun Segunda, (16/04/2018)

Terezinha de Deus | Suara Timor Lorosae

PM-MDS Tuir Kampana Sem Karta Lisensa

Posted: 13 Apr 2018 11:58 PM PDT

DILI – Aliansa Mudansa ba Progresu (AMP), lamenta Primeiru Ministru (PM) no Ministru Defeza no Seguransa (MDS),tuir kampana sem karta lisensa.

Kestaun nee hatoo husi Xefe Bankada Arao Noe katak, iha notisia balu hatete, Primeiru Ministru Alkatiri ho Ministru Defeza Somotxo ba kampana la husu lisensa servisu hodi tun ba baze.

Ami haree ba artigu 65 konstituisaun no kodiku penal artigu 241-242 laiha imparsialidade, I haree ba buat sira nee violasaun ba artigu,” katak Arao iha Komferensia Imprensaiha Media Senter AMP, Bairus Grilus, Kinta, (12/04/2018).

Nia hatutan, hahalok ida nee sira lamenta tebes, tanba nee sei prepara justisa formal hatoo ba orgaun kompatante konaba asuntu sira nee.

Iha parte seluk Adjunto Provedor Direitus Umanus no Justisa, Horacio de Almeida hatete, foin lalais media balu fo sai katak, nia sei la entrega kargu ba ema ida, tanba kargu nee nia mak tenke responsabiliza nudar PM, iha parte seluk mos nia hanesan Sekjer Fretilin sei tun ba halo nia rasik mos sei tuun ba halo kampana.

Notisia kompletu lee iha jornal STL edisaun Sabado, (14/04/2018).

Guilhermina Franco / Terezinha de Deus Suara Timor Lorosae
You are subscribed to email updates from TIMOR AGORA.
To stop receiving these emails, you may unsubscribe now. Email delivery powered by Google
Google, 1600 Amphitheatre Parkway, Mountain View, CA 94043, United States