timor agora 11/10/17

TIMOR AGORA

TIMOR LESTE PERSIZA ITA HOTU NIA HAMUTUK LIU HUSI SIMU MALU NO KONSIDEA MALU
Taur Manifesta Preokupasaun Ba Xanana
CPN-PLP Suspende ‘Sama La Rua’ Cs
MF Aprezenta Orsamentu Retifikativu
Agostinho Somotxo: Presiza Iha Lei Krimi Organizadu
L4 Planu Hadia Jardim Heroi Metinaro
MENSÁJEN HOSI PREZIDENTE REPÚBLIKA, DR. FRANCISCO GUTERRES LÚ OLO
PN Lamenta Diretór Obriga Foti Xanana Nia Karreta
Deputada Carmelita Lamenta Media Hatun Notisia Provokativu

TIMOR LESTE PERSIZA ITA HOTU NIA HAMUTUK LIU HUSI SIMU MALU NO KONSIDEA MALU

Posted: 10 Oct 2017 09:58 PM PDT
“Tenke kuidadu situasaun politiku ne’ebé frajil atu labele monu ba konflitu”

Abel Amaral *, opiniaun

Nasaun ida atu la’o ba oin nia labele hakat ba deit nune’e maibe persiza nia emar sira nia hamutuk hodi hahu hanoin, hala’o no hadia moris povu no nasaun tanba liu husi hamutuk bele hahu halo buat ruma, hadia buat ruma ne’ebé seidauk diak, hametin buat ne’ebé diak ona no hanoin foun atu halo buat ne’ebé seidauk halo. Hanesan dadaun ne’e ita hotu akompanha kona-ba eleisaun rua ne’ebé ita hakat liu ona, iha ema balu preukupa tebes ho situasaun seguransa rai laran tanba eleisaun rua inklui eleisaun suku, ida ne’e festa demokrasia ne’ebé pela permeira ves timor oan rasik maka organiza no lidera. Iha eleisaun hirak ne’e ita hotu hare ho matan no rona rasik ho tilun buat hotu la’o ho hakmatek, ida ne’e suksesu bo’ot ne’ebé ita hatudu ba mundu katak Timor oan la’os ema ne’ebé na’in ba konflitu maibe Timor oan ema ne’ebé na’in ba dame.

Iha nasaun demokrasia, festa demokrasia persiza ema hotu nia involvimentu atu deside ba se maka atu halo saida ba povu no nasaun? iha ne’e hau sei ladehan deit ba sira ne’ebé idade too ona atu ba vota maibe ba Timor-Oan hotu-hotu. Ita hotu asiste liu tiha eleisaun, povu sei hein no rona deit saida maka reprezentante povu atu halo ba sira (povu) tanba povu fo ona sira nia fiar ba politiku na’in sira atu ukun no jere moris diak ba sira (povu). Hanesan ita hotu akompanha prosesu politika rai laran hahu husi prosesu tomada de posse ba membru parlementu foun (IV lejislatura nian) too ba iha tomada de posse ba VII guvernu konstitusional, ita hare prosesu ida ne’ebé la’os fasil. Tuir hau nia hare, situasaun politiku iha nivel alto bele dehan hanesan laloran tasi ne’ebé lulun an tun sae maibe iha nia diak ida maka, povu no joven hotu hare no rona deit, sira hotu hala’o sira nia atividade moris hanesan babain mesmu ikus-ikus ne’e ita rona iha konflitu kiik-kiik mosu iha bairu balu iha capital Dili maibe konfrontasaun hirak ne’e espera katak laiha ligasaun ho situasaun atual ho prosesu politiku tomak.

Iha situasaun hanesana dadaun ne’e, lider politiku sira hotu tenke hala’o politiku tuir promesa sira ne’ebé ita bo’ot sira hato’o ba publiku katak atu tau interse nasional liu buat hotuhotu inklui interese pesoal ka interese politiku nian. Tanba povu Timor Leste hatudu ona exemplu diak ba lider Timor Oan hotu-hotu katak mesmu lider politiku sira iha oin buis ba malu maibe povu nafatin hare malu oin midar ba malu. Ida hatudu ba lider sira katak povu hakarak moris hakmatek nune’e, lider politiku sira hotu tenke rona malu no respeitu malu. Bainhira lider sira respeitu malu hanesan mos respeitu povu nia votus. Tuir hau nia hanoin, iha nasaun demokrasia la’os deit povu maka aprende maturidade politiku husi lider politiku sira maibe lasala mos líder sira aprende maturidade politiku husi povu liu-liu kona-ba paz no stabilidade tanba bainhira iha tensaun entre lider politiku sira mosu, povu hakmatek nafatin, ida ne’e pontus diak no persiza hakerek iha agenda moris nian. Karik ita kompara ho eleisaun sira uluk liu, bainhira lider politiku sira kolia sala oituan deit povu kiik sira raut malu dadaun. Hare situasaun iha tinan 2017 prosesu eleisaun too tama iha formasaun guvernu situasaun em geral bele dehan la’o ho diak. Ida ne’e ezemplu diak no husu ba nai ulun sira atu labele politiza konflitu kiik-kiik ne’ebé mosu iha rai laran, karik atu liga ba situasaun atual ho prossu politiku tomak lider sira hotu atu bele hare didiak, buka hatene no lori provas depois maka bele halo konkluzaun katak konflitu entre A no B tanba impaktu husi prosesu politiku A ka B. Sekuandu iha duni ligasaun ho prosesu formasaun guvernu, bele buka lalais ninia solusaun tanba kolia kona-ba stabilidade nasaun la’os iha ema ida rua nia responsabilidade maibe timor oan hotu nia responsabilidade. Treste tebes sekuandu iha konflitu kiik ruma mosu lider sira balu tau todan ba lider sira seluk, ida ne’e la’os kritika maibe fo hanoin ba ita hotu atu labele tau todan ba malu.

Ikus liu rekomenda ba lider politiku sira liu-liu partidu sira ne’ebé hetan asentu parlementar atu bele kuidadu situasaun atual ne’ebé iha tanba iha ema balu konsidera situasaun politiku atual frajil oituan maibe husu ba ita hotu liu-liu lider sira atu bele kuidadu situasaun frajil ne’e atu labele monu ba konflitu tanba Timor Leste iha ona esperiensia lubuk kona-ba konflitu no rezultadu husi konflitu povu kiik maka nafatin lori todan.

Obrigadu e bem hajam

*Autor: Abel Amaral
Estudante finalista husi UNPAZ, fakuldade Direitu, servisu iha Fundasaun Mahein
Email: [email protected] / [email protected]

Taur Manifesta Preokupasaun Ba Xanana

Posted: 10 Oct 2017 09:46 PM PDT
DILI, (TATOLI) – Prezidente Partidu Libertasaun Popular (PLP), Taur Matan Ruak rekoñese katak, nia ho Xanana Gusmão halo ona kontaktu ba malu maski liu hosi telefone de’it.

Iha komunikasaun entre lider opozisaun Nain rua ne’e, Taur Matan Ruak manifesta nia preokupasaun ba Prezidente Partidu CNRT, Kay Rala Xanana Gusmão kona-bá pozisaun Fretilín nian.

“Ami Nain rua ko’alia iha telefone, ha’u manifesta ha’u nia preokupasaun ba frajilidade, inkonsisténsia Fretilín nian,” Taur Matan Ruak fó sai ba Jornalista sira iha nia hela fatin, Metiaut, ohin.

Taur Matan Ruak dehan, tentativa koligasaun entre Fretilín ho PLP para iha dalan klaran tanba iha prosesu negosiasaun partidu rua ne’e la entende malu kona-bá modalidade governasaun no pozisaun iha Parlamentu Nasionál.

Modalidade governasaun ne’ebé PLP prefere mak koligasaun, maibé Fretilín aprezenta modalidade tolu, koligasaun, insidénsia parlamentár, inkluzaun.

Iha Parte polítika, PLP kontra konsentrasaun podér, konsentrasaun rekursu no konsentrasaun priviléjiu, defende desentralizasaun kompeténsia no desentralizasaun governasaun ho métodu dezenvolvimentu país Nian tenke ekilibradu, fó prioridade ba nesesidade bázika duke projetu boot ne’ebé nia rétornu duvidozu inklui boa governasaun.

“Modalidade governasaun, polítika, programas, pozisaun iha Parlamentu. Saida mak ami konsidera hanesan pontu krítiku ? ami hetan pontu krítiku rua; ida modalidade governasaun, ha’u hatete Fretilín nia pozisaun la inspira ha’u nia partidu,” Taur Matan Ruak realsa.

Hodi hatutan, “ha’u tuir ema ida ne’ebé la hatene saida mak nia hakarak los, ne’e la bele.”

Entertantu iha negosiasaun PLP la apoia Fretilín atu okupa hotu pozisaun sira iha Parlamentu, maibé apoia Fretilín atu asume knaar nu’udar Primeiru Ministru e iha governu PLP bele sai elementu sekundáriu de’it.

“Hakarak hatete ba públiku katak, kulpa la’ós ami nian. Inisiativa rotura ne’e fretilín nian. Tanba ne’e sira la bele fó sala ba ami. Agradese ba Fretilín tanba ami diskute oi tuan hodi koñese malu,” Taur hato’o.

Jornalista: Rafy Belo | Editór: Manuel Pinto

Foto: Prezidente Partidu Libertasaun Popular (PLP), Taur Matan Ruak FOTO: Antonio Goncalves

CPN-PLP Suspende ‘Sama La Rua’ Cs

Posted: 10 Oct 2017 09:22 PM PDT
DILI, (TATOLI) – Partidu Libertasaun Populár (PLP) bazeia ba estatutu partidu, artigu 19o(sansaun no meius aplikasaun) liuhusi CPN (Conselho Política Nacional) hasai desizaun hodi suspende kuadru polítika PLP ne’ebé rezigna aan hodi envolve iha governasaun da-hitu, hanesan José Neves-Samalarua, Cipriano Estevez, no L4.

“Órgaun superiór PLP deside hodi suspende husi kargu partidu no la permite no la autoriza hodi partisipa iha kalendáriu ka atividade PLP iha territóriu tomak durante asume kna’ar públiku ka governasaun,” haktuir komunikadu PLP, ajénsia Tatoli asesu, ohin, iha Metiaut, Díli.

Deklarasaun ne’e fó sai bazea ba karta rezignasaun kuadru polítika PLP, José Neves-Samalarua iha loron 4 Outubru 2017 husi pozisaun nu’udar prezidente komisaun fiskalizasaun ekonomia finanseiru PLP.

Nune’e mós, Cipriano Esteves Ferreira husi pozisaun nu’udar xefe komisaun juridisaun PLP munisípiu Ainaro nian no membru konsellu polítika nasionál husi postu Ainaro Vila.

PLP mós la permite “L-4” partisipa iha atividade PLP nian. “Iha tempu hanesan, André da Costa Belo ‘L-4’ nu’udar fundadór PLP nian, partidu sei la permite hodi partisipa iha kualker atividade PLP nian durante sei hala’o kna’ar nu’udar membru governu,” haktuir tan komunikadu ne’e.

Hodi hatutan mós katak kuadru polítiku PLP nian ne’ebé hetan kontaktu pesoál no diretamente no halo ona konsulta ho estrutura nasionál PLP nian.

Bazea ba desizaun koletiva estrutura nasionál PLP nian re-afirma katak la autoriza kuadru polítika no militante PLP nian atu envolve iha governasaun da-hitu no institusionalmente la reprezenta papel partidu iha partisipasaun governasaun no partidu konsidera no deside katak partisipasaun nu’udar pesoál no profesionál.

Ba harmonizasaun no integridade institusionál PLP husi estrutura nível nasionál to’o aldeia kontinua sólidu no hametin maturidade no konsolidasaun hodi kontribui ba prosesu estabilidade nasionál.

“Desizaun ida ne’e implementa loron/data ne’ebé kuadru polítiku/membru ka militante PLP nian simu pose nu’udar membru governasaun da-hitu nian, la iha ona oportunidade atu partisipa kualker atividade PLP nian inklui atividade sira hanesan reuniaun kuadru superiór, médiu no reuniaun sira seluk durante asumi kna’ar nu’udar membru governu,” relata kuadru PLP iha komunikadu ne’e.

Entretantu, estatutu partidu PLP, artigu 19o (sansaun no meius aplikasaun) define katak 1) membru no estrutura partidu nian sei hetan kastigu disiplinár ou sansaun partidu nian bainhira; viola estatutu no orientasaun partidu polítiku nian, komete hahalok ne’ebé estraga naran partidu nian.

2) Forma ba aplika sansaun mak hanesan fó atensaun verbal, fó atensaun ho eskrita, suspensaun ba fulan neen no hasai husi partidu.

Desizaun CPN PLP hodi halo suspensaun bazea mós ba estatutu partidu nian, sub-sekasaun III, Konsellu Polítika Nasionál, artigu 28o, natureza, kompozisaun no kompeténsia.

Nota pareser Komisaun Nasionál Juridisaun-KNJ/03/X/2017 ba prezidente partidu, karta despasu prezidente partidu PLP, loron 04 outubru 2017 ba CPN atu koordena ho KNJ hodi asegura no unidade nomós disiplina partidu.

Komunikadu ne’e fó sai ofisialmente ho asinatura husi reprezentante PLP hanesan Vise Prezidente KPN I Sabino Soares Guntur, Vise-2 Francisco Vasconcelhos, Vise III Mericio Juvinal dos Reis ‘Akara’, Vise IV António Freitas no Vise V Aniceto Guro-Berteni Neves.

Jornalista: Rafy Belo | Editór: Manuel Pinto

MF Aprezenta Orsamentu Retifikativu

Posted: 10 Oct 2017 09:14 PM PDT
DILI, (TATOLI) – Tékniku sira hosi Ministériu Finansa (FM) ohin aprezenta orsamentu retifikativu iha reuniaun Konsellu Ministru (KM).

“Pontu prinsipál ne’ebé ohin ko’alia iha Konsellu Ministru (KM) mak konfirmasaun programa governu nian antes atu ba aprezenta iha Parlamentu Nasionál (PN) no tékniku hosi Ministériu Finansa (FM) aprezenta mós orsamentu retifikativu ba tinan fiskál ida ne’e nian”, informa Sekretáriu Estadu KM no Komunikasaun Sosiál, Matias Freitas Boavida ba jornalista sira iha Palásiu Governu, tersa (10/10).

Nia hatutan, foin mak MF aprezenta orsamentu retifikativu mai KM tanba planu orsamentu ne’e MF nia responsabilidade.

Montante orsamentu retifikativu, nia hatan, orsamentu ne’e foin mak halo aprezentasaun maibé nia montante seidauk iha serteza.

“Ami husu ba tékniku Ministériu Finansa (MF) atu aprezenta maibé sei iha faze preparasaun, entaun montante orsamentu retifikativu depois mak ko’alia”, hateten nia.

MF mai aprezenta orsamentu iha KM atu ita haree katak ba oin atu halo oinsá, tanba ne’e sei iha tempu, presiza liuhosi etapa hafoin ba aprezenta iha PN.

Jornalista: Zezito Silva | Editora: Rita Almeida

Foto: Enkontru Konsellu Ministru ohin. Foto GPM

Agostinho Somotxo: Presiza Iha Lei Krimi Organizadu

Posted: 10 Oct 2017 04:41 AM PDT
DILI – Ministru da Defesa e Seguransa Agostinho Somotxo hateten, Agora nee presiza lei konaba krimi organizadu, para fo forsa ba Forsa Armadas no Forsa Seguransa.

“Hau lakoi kolia ona artemarsiais, tanba artemarsiais nee iha objetivu rua neebe ita hotu hatene desportivu, ida auto defeza ka bela diri, agora artemarsiais neebe ita temi nee lakonsideira artemarsiais, neebe presiza lejislasaun ida hanesan fo forsa ba Forsa Seguransa no Forsa Armadas,” dehan Ministru Somotxo, ba jornalista sira iha Palasiu Governu, Tersa (10/10/2017).

Ministru Somotxo hateten, Iha lejislasaun nee sei halo sosializasaun konaba lejislasaun foun nee, neebe agora mantein ho ida nee, tanba aban bain rua nia (Red.Ministru Somotxo ) servisu nee tenke bolu hotu autoridade sira hotu, para sira mos bele kontribui ba seguransa.

Nia dehan, Artemarsiais neebe hemu ran halo juramentu nee laos artemarisiais, neebe prepara hela lei ba ida to aban bain rua mos lao, laos derepende deit ba baku kaer ema, maibe tenke sosializa uluk.

Iha fatin hanesan bainhira jornalista sira konfirma asuntu ema oho malu no hana malu iha rai laran ba Ministru de Estadu e Konselleiru Para Seguransa Nasional Jose Ramos Horta, Ministru de Estadu nee hateten, Kolia ho Ministru da Defesa e Seguransa Agostinho Somotxo, dehan Ministru Horta.

Entretantu deputadu PD Manuel Carvalho Lito Rambo, husu ba ministeriu relevante atu bele kontrola joven sira hodi labele hemu tua iha estrada laran, tanba dalaruma ema faan tua iha dalan-dalan joven sira mos sosa hodi hemu tua iha dalan nian, sira nee ikus mai mosu komfrontasaun oin-oin hanesan iha Taibesi, Hudi-Laran.

Carme Ximenes | Suara Timor Lorosae

Foto iha Independente

L4 Planu Hadia Jardim Heroi Metinaro

Posted: 10 Oct 2017 04:34 AM PDT
DILI – Sekertariu Estadu dos Veteranus Andre da Costa Belo alias L4 hateten, Iha programa tenke hadia jardim herois, neebe bee masin halo estraga rate sira.

“Jardim de herois nee hau hanoin hau foin servisu loron rua tolu neebe seidauk iha program, mais iha programa tenke hadia,” dehan Sekertariu Estadu L4.

Nia dehan, Kuandu koalia konaba servisu tenke ho orsamentu, neebe iha orsamentu ratefikativu nian liu ida nee maka bele hare, mais to agora nee programa mos sei liu ka laliu sei lori ba aprezenta ba Parlamentu.

Iha parte ketak Diretor ONG Gertak Faustinho Magno hateten Governu liu husi Sekertariu de Estadu dos Veteranus presiza hadia jardim herois sira iha Munisipiu hotu, atu nunee bele halot heroi sira neebe maka mate ba rai ida nee ho dignu.

Entretantu Manuel da Costa hanesan observador nasional husu Governu liu husi Konsellu Veteranus neebe maka estabelese ona, atu rekoila nafatin ruin saudozu sira neebe maka mate ba nasaun ida hodi ba halot hamutuk iha jardim heroi.

Carme Ximenes | Suara Timor Lorosae

MENSÁJEN HOSI PREZIDENTE REPÚBLIKA, DR. FRANCISCO GUTERRES LÚ OLO

Posted: 10 Oct 2017 03:31 AM PDT
BA POVU DOBEN TIMOR-LESTE

Dili, 10 Outubru 2017

Povu doben Timor-Leste !

Dala lima ona mak ha’u mai ko’alia ba imi, ha’u nia maun, bin, alin sira, namkari iha Timor-Leste tomak, liuhosi Radiu Televizaun Timor-Leste, nu’udar Xefe Estadu.

Liuhosi meiu komunikasaun ida ne’e, ha’u mai fó-hanoin fila fali ba maluk sira hotu, ha’u-nia kompromisu sira, buat ne’ebé ha’u promete ba povu tomak, iha loron tomada-de-pose, nu’udar Prezidente Repúblika iha 20 maiu 2017. Durante ha’u-nia mandatu ha’u sei kesi ha’u-nia án metin ba kompromisu sira ne’e ho respeitu tomak ba konstituisaun Timor-Leste nian.

Ita-nia konstituisaun ta’u aas tebes ita-nia riku soin ida ho valór aas liu, iha rai ida ne’e. Rikusoin aas liu ne’e, mak maluk sira duni, ita hotu, feto ka mane, katuas ka ferik ka klosan, ho fiar no kbiit ne’ebé de’it, hosi aldeia ne’ebé de’it, iha Timor-Leste tomak.

Tanba respeitu ba povu ida ne’e mak ita-nia konstituisaun fó dalan ba ita hotu, ho otas 17 ba leten, partisipa iha atu eleitorál boot rua, tinan lima- lima. Ida hodi ita hili Prezidente Repúblika! Ida fali atu hili partidu ida ne’ebé ita ida-idak fó fiar atu reprezenta povu iha Parlamentu Nasionál no kaer governu.

Liu hosi eleisaum justa no livre, halo iha 22 jullu 2017 no tuir lei no regulamentu kona-ba eleisaun lejislativa, hosi partidu sanulu resin neen, partidu lima de’it mak bele tuur iha Parlamentu Nasionál.

Iha eleisaun ikus liu, la iha partidu ida manán boot liu, hosi povu nia votus, atu ukun mesak, tinan lima tuir mai. Nune’e, povu husu no hein partidu lima ne’e fó liman ba malu. Fó liman oinsá? Ida ne’e monu ba responsabilidade partidu ida-idak nian. La’ós kompeténsia Prezidente Repúblika, atu hatudu, oinsá partidu sira fó liman ba malu.

Nu’udar Xefe-Estadu, ha’u iha de’it devér atu rona no fó apoiu, tuir ha’u-nia kompeténsia konstitusionál. Ha’u iha devér atu ajuda partidu sira habelar espíritu toleránsia no unidade nasionál, hametin pás no estabilidade no garante respeitu ba ita-nia konstituisaun.

Ho espíritu ida ne’e mak ha’u bolu fila fali partidu ida-idak mai tesi lia ho ha’u, nu’udar Prezidente Repúblika, oin ba oin, hafoin rezultadu eleisaun fó-sai ofisialmente. Ha’u rona no simu ho laran haksolok katak partidu ida-idak hakarak atu kontribui ba pás no estabilidade. Ha’u haree no sente rasik katak partidu hotu-hotu hakarak fó liman ba malu atu haburas ita-nia rain no hadia povu ninia moris ohin loron no abanbairua.

Hafoin hala’o diálogu keta-ketak ho lider partidu sira hotu, ha’ u bolu FRETILIN, nu’udar partidu vensedór, atu ko’alia ho partidu sira seluk, hodi harii governu. Ha’u nomeia sr mari alkatiri, nu’udar primeiru-ministru, hafoin rona mós partidu sira seluk, ne’ebé la tama koligasaun governu.

Iha prosesu buka dalan atu ukun metin ba tinan lima, mosu difikuldade oin-oin. Difikuldade ne’ebé sátan oituan prosesu harii no formaliza VII governu iha tempu badak. Hafoin diálogu ba mai, koligasaun FRETILIN-PD lao ba oin no ha’u, nu’udar Prezidente Repúblika fó ona posse dala rua ba membrus VII governu, tuir konstituisaun haruka.

Iha prosesu tomak to’o loron tomada-de-posse membrus VII governu, partidu oposizaun sira hatudu maturidade polítika no fó sentidu estadu bainhira hatete katak sei halo opozisaun konstrutiva.

Ha’u hanoin opozisaun konstrutiva ne’e sei hato’o proposta atu hadi’a governasaun, atu hadi’a di’ak liután moris di’ak ba ita-nia povu.

Ha’u fiar katak VII governu sei metin tamba partidu hotu- hotu tau aas prinsípius, valores, ho kompromisu ne’ebé tanen estabilidade governativa no iha sentidu estadu. Loos katak prosesu harii governu ida ne’e lao kleur liu horiuluk nian. Maibé tempu la’ós faktor importante liu iha situasaun espesiál ida ne’e. Importante liu tempu, mak kualidade ba buat ne’ebé ita harii ho tempu.

VII governu hato’o ona ba Parlamentu Nasionál, proposta programa ne’ebé fó-sai oinsá governu sei haburas ita-nia rain. Ita hotu sei rona deputadu sira haksesuk, hato’o sira-nia hanoin, rona, hadi’a no ikus mai, simu programa governu nian, nu’udar programa ita hotu nian, nu’udar programa nasaun nian.

Ha’u fiar katak deputadu hotu-hotu sei hatudu maturidade polítika, sei fó-an tomak atu hadi’a proposta programa hosi VII governu, atu povu bele moris di’ak liután ohinloron no abanbairua.

Nu’udar Prezidente Repúblika ha’u sei buka halo diálogu nafatin ho partidu polítiku sira, tuur iha parlamentu ka lae, ho organizasaun hotu-hotu, ho sosiedade sivíl tomak, tuir ha’ u-nia kompromisu rasik.

Ho hotu ninia hanoin no hakarak, liuliu hosi parlamentu no orgaun estadu no instituisaun sira seluk, liuhosi meiu komunikasaun, ita bele hadi’ a saída ida de’it, atu haburas rai ida ne’e, hadi’ a povu tomak ninia moris.

Ha’u husu ho fiar ba povu tomak, liuliu ba joven sira, atu tuur hakmatek nafatin enkuantu deputadu sira tetu programa mai hosi governu, atu hadi’a ita-nia moris di’ak.

Ita hotu-hotu hakarak atu rai ne’e lao ba oin ho ita-hotu ninia matenek. Ita la hasees partidu ida, organizasaun ne’ebé de’it, ema ne’ebé de’it.

Atu serví ita-nia povu, ita tenke rona malu, hatene halo diálogu, halo kompromisu tuir prinsípius no valoires, atu hetan dalan di’ak liután, atu halo di’ak liután.

Ha’u fiar katak ita hotu sei halo ida ne’e!

Obrigadu!

TATOLI | Foto: Prezidente Repúblika, Francisco Guterres Lú Olo. Imajen Mídia Palásiu PR.

PN Lamenta Diretór Obriga Foti Xanana Nia Karreta

Posted: 10 Oct 2017 03:18 AM PDT
DILI, (TATOLI) – Deputadu Parlamentu Nasionál sira hosi bankada CNRT, Fretilín sente preokupadu tanba horisehik, (Segunda) Diretór hosi patrimóniu estadu obriga foti karreta xapa azúl ne’ebé durante ne’e Ministru Planeamentu, Investimentu, Estratéjiku (MPIE), Xanana Gusmão uza.

Asaun Diretór ne’ebé deputadu sira la fó sai naran ne’e, konsidera hanesan traisaun ba lider nasionál Kay Rala Xanana Gusmão, basa tuir deputadu sira maski Xanana la asume ona kargu nu’udar membru governu maibé oras ne’e sei hala’o misaun ida iha rai li’ur lori Timor-Leste nia naran.

Deputadu bankada CNRT, Natalino Dos Santos dehan, ministériu balun husi departamentu ne’ebé haree ba asuntu patrimóniu estadu, horisehik obriga atu foti karreta ne’ebé lider nasionál, Xanana Gusmão uza durante ninia mandatu, bainhira Xanana agora daudauk lori hela misaun estadu ba rai liur.

“Sira mai sein iha despaxu maibé obriga atu foti karreta, tanba ne’e diretór husi MPIE la fó no sira dehan sei mai fali,” Natalino konta tuir. Hodi lamenta tebes ho atitude diretór ne’ebé obriga foti karreta ne’e.

“Timoroan hotu tenke dignifika lider nasionál sira, mezmu iha deferénsia ideia maibé ita tenke valoriza sira, liu-liu sira ne’ebé fundadór estadu, sira ne’ebé hanesan abut ba rai ne’e, tenke respeita sira iha kualkér tempu, tanba ne’e ha’u lamenta tebes nu’udar jerasaun foun no nu’udar deputadu,” Natalino dos Santos espresa nia lamentasaun.

Hodi fó hanoin katak, karreta ne’e bele foti maibé atu di’ak liu hein Xanana fila mai mak bele foti.

Hanoin hanesan reforsa mós hosi deputadu bankada Fretilín Aurelio Freitas no Deputada Maria Angélica. Entretantu Prezidente Parlamentu Nasionál Aniceto Guterres promete katak sei kontaktu diretamente ba Primeiru Ministru hodi husu klarifikasaun kona-bá asuntu refere.

“Sei buka konfirma no identifika karik iha ema ka grupu ruma lori governu nia naran atu dada karreta husi lider nasionál,” Aniceto haktuir.

Jornalista: Julia Chatarina | Editór: Manuel Pinto

Foto: Deputadu ba lejislatura da-haat halo juramentu bainhira simu tomada de pose iha Parlamentu Nasionál foin lalais ne’e. Foto Tatoli/António Goncalves

Deputada Carmelita Lamenta Media Hatun Notisia Provokativu

Posted: 09 Oct 2017 11:36 PM PDT
THE TIMOR-NEWS.com, DILI – Parlamento Nasional (PN) liu husi deputada bankada CNRT Carmelita Moniz preokupa ho media balun ne’ebe hasai notisia nakonu ho provokativu.

Deputada ne’e afirma, durante tinan hat (4) resin nia sai vitima ba media nia hahalok liu-liu kona ba notisia hirak ne’ebe mak media sira publika.

“liu husi plenaria ida ne’e, hau hakarak husu ba Konsellu Imprensa (KI) atu hare lalaok media hot-hotu hodi nune’e halo avaliasaun didiak ba media hot-hotu liu husi informasaun ne’ebe durante ne’e sira publika sai ba publiku nakonu ho notisia provokativu,” dehan Carmelita Moniz iha Plenaria PN, Segunda (09/10/2017).
Nia hatutan, media iha liberdade imprensa maibe tenke nakonu mos responsabilidade atu nune’e labele mosu konflitus.

“Hau la temi deputadu ida maibe iha tinan sira liu ba ita sira ne’e sai vitima ba informasaun ne’ebe publika sai husi media sira, tanba dala barak media sira uja titulu notisia oin seluk iha kontiudu oinseluk fali, ne’e mak mosu konflitus,” dehan deputada Carmelita.

Tanba ne’e nia husu atu PN atu hasai lei komunikasaun social ho didiak atu nune’e bele ejiji ba media sira halo knar tuir lei.

Iha sorin seluk deputadu bankada PD Manuel Carvalho “Lito Rambo” hatete, media hanesan mos Papel importante ida hodi kontribui ba dezenvolvimentu iha Timor – Leste liu husi informasaun.

“Media hanesan makina kontrolu social ida, nee duni hau hanoin ita labele fo sala bebeik ba sira, tanba dalaruma loron ba loron ita nia estetmentu sira ne’e dalaruma ita la kontrola ne’e mak sai nune’e,” dehan deputadu Lito Rambo.

Maske servisu media nian nian Timor–Leste presiza hadia iha parte balu maibe nia husu ba publiku inklui deputadu sira hotu tenke fo apresiasaun.

By: Hortencio SANCHES | Editóra: Agida DOS SANTOS | THE TIMOR NEWS

Foto: Deputada Carmelita Moniz. Photo: Facebook Carmelita Moniz.
You are subscribed to email updates from TIMOR AGORA.
To stop receiving these emails, you may unsubscribe now. Email delivery powered by Google
Google Inc., 1600 Amphitheatre Parkway, Mountain View, CA 94043, United States

Sobre AICL lusofonias.net

Chrys Chrystello presidente da direção e da comissão executiva da AICL
Esta entrada foi publicada em AICL no tag com as tags . ligação permanente.

Deixe um comentário