TIMOR AGORA 1/3/17

TIMOR AGORA

Setor Privado Responsabiliza halo Jestaun ba Lixu Iha Dili Laran
Orsamentu Tarde Hamosu Difikuldade ba Preparasaun Eleisau iha Marsu
PD IHA LIDERANSA FOUN…!!!
PNTL-F-FDTL HAMUTUK ASEGURA ELEISAUN JERAL, LA TOLERA ENTIDADES KRIA INSTABILIDADE
SERVSIU PR TAUR BARAK LIU IHA RAI LARAN
DESKONFIA TAMA ATAMBUA ILEGAL TNI KAPTURA MEMBRU UPF NAIN RUA
ME Rekoinese 50% Kondisaun Infransturtura Sei Minimu
Dili Sai Fatin Prostituisaun
Governu Tenke Kria Kondisaun Promove Kafe Timor
Dionisio Babo: CNRT Orguillu Fretilin Kandidata Lu-Olo Ba PR
Veta Lei PV, CNRT Ho Taur Laiha Relasaun
Isabel: PLP Espiritu Mai Husi Taur Matan Ruak
KSTL REKOMENDA SALARIU MÍNIMU US$ 150
JOSÉ NEVES: LABELE “HATUDU DEIT LIMAN” BA ÓRGAUN JUDISIÁRIU
LEI MAKA FO MANDATU BA TENENTE NO MAIJOR
FERNANDA BORGES LIDERA REFORMA FISKAL
Alunus besik 270 tama iha unidade 1ª formasaun superior téknika iha sul Timor-Leste
Governu timoroan lakomenta relatóriu komisaun parlamentar ne’ebé seidauk simu

Setor Privado Responsabiliza halo Jestaun ba Lixu Iha Dili Laran

Posted: 28 Feb 2017 06:19 PM PST
Autoridade Munisipio Dili fo responsabilidade tomak ba setor privado sira atu halo jestaun ba lixu sira iha Dili laran.

Prezidente Autoridade Munisipio Dili, Gaspar Soares hateten efetivu liu kuando setor privado mak halo jestaun ba lixu, tanba sira bele halo servisu lor-loron.

“Durante ne’e ita nia governu liu husi ekipa saneamentu mak halo jestaun ba lixu, hanesan funsionario publiku iha loron Sabadu no Domingu sira feriadu, entaun lixu aumenta barak liu tan,” nia hateten iha Salaun Joao Paulo II Comoro, Dili.

Nia hateten, komunidade barak mak seidauk iha konsiensia atu soe foer iha fatin lixu nian maske bebeik ona halo sosializasaun ba sira, ne’e mak obstaklu bo’ot.

Alende ne’e, nia dehan, problema seluk ne’ebe munisipio Dili hasoru ohin loron mak problema urbanizasaun, ema hotu mai konsentra iha sidade ho antesedensia ne’ebe la hanesan, ema harii uma no fa’an sasan arbiru deit iha fatin-fatin.

“Ita bebeik ona halo sosializasaun no lei mos bandu, maibe situasaun ne’e laiha mudansa, tanba komunidade laiha konsiensia,” nia kestiona.

Tuir dekretu lei numeru 33/2009, katak ba individu no koletivu ne’ebe soe foer arbiru sei hetan sansaun multa husi $5-500 maibe laiha esplikasaun klaru kona ba sansaun ne’ebe iha, seidauk implementa, liu-liu aplikasaun koima.

Maske nune’e, nia husu ba autoridade local sira atu nafatin halo sosializasaun ba komunidades tanba kapital Dili ema hela la permanente iha fatin ida.

Iha parte seluk, Membru Parlamentar (MP) Eladio Faculto konkorda governu entrega problema lixu ba setor privado hodi jere liu –liu haree ba fabrika sira.

“Lixu ne’e iha oin rua ; organiku no non-organiku tanba ne’e importante atu lixu ne’ebe organiku halo fila fali sai adubu, enkuantu lixu hanesan plastiku sira transforma fali ba buat seluk ne’ebe bele uza,” nia hateten.

Durante ne’e, nia dehan governu selu kompania sira raut foer iha sidade laran, maibe ladauk rezolve e lixu barak liu tan iha dalan ninin sira.

Entretantu komunidade Justino da Silva, espera planu ida ne’e bele realize.

“Ida ne’e diak atu motiva mos komunidade sira rekolha lixu hodi fa’an fali ba kompania sira,” nia dehan.

The Dili Weekly

Orsamentu Tarde Hamosu Difikuldade ba Preparasaun Eleisau iha Marsu

Posted: 28 Feb 2017 06:16 PM PST
Orsamentu sai tarde difikulta servisu Sekretariadu Tekniku Administrasaun Eleitoral (STAE) ba preparasaun elisaun prezidensial periodu tinan (2017-2021) iha loron 20 Marsu.

Iha vizita surpreza foin lalais, Primeiru Ministru Rui Maria de Araujo ba STAE husu atu aselera prosesu asesu ba orsamentu hodi halo preparasaun ne’ebe diak intermus tekniku, tanba tempu besik dadaun ona.

Nia rekonese, katak iha servisu tekniku lubuk ida mak sira halo ona inklui mos resensiamentu ne’ebe hala’o iha rai laran no liur.

“Laiha problema barak, maibe parte logistiku iha buat balun tenke aselera hanesan asesu ba orsamentu, manutensaun ba kareta, kompras ba urna sira,” nia hateten fahoin haree besik servisu ekipa STAE nian iha Kaikoli, Dili.

Nia hateten, governu iha obrigasaun bo’ot atu buka rezolve problema ne’e hodi fo kondisaun ba STAE hodi apoia prosesu elisaun jeral.

Kona ba kestaun ne’e, Ministru Koordenador asuntu Administrasaun Publika no Ministru Administrasaun Estatal, Dionisio Babo Soares hateten ministerio tenke halo proposta ba Gabinete Primeiru Ministru hodi hetan aprovasaun no lori ba Ministerio Finansas justifika no aloka orsamentu.

“Ita nia sistema mak nune’e duni, maibe ami hatama ona proposta ba iha gabinete primeiru ministru atu hetan aprovasaun,” nia hateten.

Nia hateten, orsamentu tarde tanba ne’e iha prosesu balun presiza halo justifikasaun direita ba kompania sira.

Tuir kalendario elisaun sei halao simultaneamente iha rai laran, enkuantu iha rai liur depende ba oras local no kontagen sei hala’o iha Timor.
“Ami prepara ona osan selu pasta especial atu tau urna hodi tula iha aviaun lori mai halo kontagen iha Timor,” nia hateten.

Nia dehan, total orsamentu ne’ebe aloka ba elisaun prezidensial no parlamentar hamutuk $10 miloens.

The Dili Weekly

PD IHA LIDERANSA FOUN…!!!

Posted: 28 Feb 2017 03:06 PM PST
Jornal Nacional Diário, editorial

Partido Demokratiku (PD) besik tinan rua lakon ninia lider maximu, Presidente Partido, saudoso Fernando Lasama nebe halo partido nee hanesan ‘ ayam kehilangan induknya’ besik tinan rua.

No Partido nebe koinesidu partido jerasaun foun nee hetan fali ona lider foun nebe mai husi kongresu nasional, Mariano Asanami Sabino (Presidente) no Antonio da Conceição ‘ Kalohan’ (Sekjen).

Partido nee depois de Lasama mate, lakon estabilidade politika partido nian hodi halo partido komesa nakdoko, militante halai tun sae, laiha ona sinkronisasaun politika PD nian iha governo no iha bankada PD nian Parlamento Nasional.

PD lakon mos komunikasaun politika iha Bloku Koligasaun hodi nunee, dekralasaun Politika PD nian iha Parlamento Nasional deklarasaun sira nebe larefleta ona prinsipiu Bloku Koligasaun nian.

PD sai hanesan fali opozisaun iha Bloku Koligasaun, tan nee CNRT nudar forsa politika maior iha parlamento halo re-estrutura iha Parlamento hodi hasai Vice Presidente Parlamento, Adriano Nascimento no hakotu Bloku Koligasaun no PD ofisialmente deklara sai partido opozisaun.

Agora estrutura foun PD nian sei halo servisu makaas atu oinsa bele hadia fali komunikasaun politika ho partido politiku sira nebe besik tinan rua ladun diak no mos kontinua mantein konfiansa militante sira atu nunee PD mantein kadeira 8 iha parlamento nasional.

“Ho kongresu nebe hau asumi nudar Prezidente Partido, hau hakarak sente hau niamaun sira sente partido nee, hakarak sente partido nee sira nian, partido nee laos parseiru nian, laos atu kontra sira. I maun Xanana, Mari no Lu-Olo sente ami sira nee jerasaun prontu atu sira nia kritika” Mariano Asanami Sabino, Publikasaun Jornal Nacional Diario, edisaun 27/02/2017.

Deklarasaun Presidente PD eleitu, nee inisiu ida nebe diak, signifika lideransa foun nee respeita ninia seniro politiku sira iha ambitu nee, Xanana Gusmão, Mari Alkatiri, Francisco Guterres ‘Lu-Olo’nudar maneira ida atu hadia komunikasaun politika politiku senior sira.

Deklarasaun Presidente PD nian hetan reasaun positivu husi partido seluk, li-liu CNRT no FRETILIN, hodi hatoo votos susesu ba estrutura leitu no susesu ba partido iha eleisaun parlamentar nebe sei mai.

Partido nebe ho nia motto ‘hanoin, harii no hametin’nebe sempre ho tema kampaiña, ‘hamutuk ho PD harii nasaun husi base’ durante iha matebian Lasama ninia lideransa, ninia militante konsisten tamba eleisaun 2001, 2007 no 2012 mantein kadeira 8 iha Parlamento Nasional.

Eleisaun parlamentar 2017 mai, karik PD mantein kadeira 8 iha Parlamento? Nee servisu todan ida ba lideransa foun Partido nian nebe foin eleitu iha terseiru kongresu.

Eleisaun jeral mai sai hanesan teste ida ba partido nee nia konistensia durante nee, tamba militantes sira bele iha hanoin afilia ba partido seluk, tantu partido tuan seluk ka partido foun barak nebe ho figura sira nebe importante no konesidu. *

PNTL-F-FDTL HAMUTUK ASEGURA ELEISAUN JERAL, LA TOLERA ENTIDADES KRIA INSTABILIDADE

Posted: 28 Feb 2017 02:54 PM PST
Policia Nasional Timor Leste (PNTL) ho Falintil Forsa Defesa Timor Leste (F-FDTL) desidi ona koopera hamutuk fo seguransa ba eleisaun Prezidensial ne’ebe sei hala’o iha loron 20 Marsu tinan 2017 ne’e, no eleisaun parlamentar mai ne’e. tantu PNTL ho F-FDTL sei la tolera entidades ne’ebe mak kria instabilidade iha eventu refere.

“Ho prinsipiu sagradu mak temi ona, ami forsa rua PNTL ho F-FDTL disidi hodi kria seguransa koordenada hodi apoiu malu, asegura eleisaun 2017, tantu eleisaun Prezidensial no eleisaun parlamentar. Karik individual ka grupu ruma mak koko atu kria instabilidade ka kria problema ruma ba ambiente eleisaun ne’e ami sei foti medida forti tebes, no laiha negosiasaun ba iha parte ne’e,” Komandante Jeral PNTL, Komisario, Julio Hornai, ho Chefi Estadu Maior F-FDTL, Maijor Jeneral, Lere Anan Timur, hato’o deklarasaun ne’ebe refere liu husi konfrensia imprensa iha Kuartel Geral PNTL-Dili, Segunda (27/02/2017).

Iha oportunidade ne’e Julio Hornai apela ba povu tomak, husi ferik no katuas, jovens no labarik feto no mane, inklui ema estranjeirus tenke kontribui ba paz no estabilidade espesial iha prosesu kampanha to’o ba eleisaun.

“Timor oan iha responsabilidade atu asegura estabilidade iha eleisaun 2017, ne’e bele la’o diak ho ambiente ne’ebé nakonu ho paz no dame nune’e Timor oan hatudu dala ida tan katak, Timor oan sira mós bele,”afirma Julio Hornai.

Komisario PNTL, Julio Hornai informa katak, tinan 2017 tinan ida ne’ebé mak importante no spesial ba Timor oan, tanba tinan ida ne’e Timor tomak sei selebra festa demokrasia hodi hili ninia Prezidente Repúblika foun ho ninia reprezentante iha Parlamentu Nacional liu husi votus konfiansa.

Eleisaun jeral prezidensial no parlamentar ba tinan 2017 ne’e sai istoria ba Timor Leste, tamba primeiraves Timor-oan rasik mak fo seguransa ba eventu importante ne’e, kompara ho tinan 2002-2007 no 2012 Timor Leste hetan apoiu seguransa masimu husi Nasoens Unidas.

Komisariu Julio Hornai hatutan, maske hasoru difikuldade oi-oin, maibe PNTL no F-FDTL ho responsabilidade nasionalismu patriotismu sei fo seguransa diak ba eventu importante ne’e.

Julio Hornai haktuir, ejistensia forsa rua PNTL no F-FDTL atu toma responsabilidade hodi asegura eleisaun, maske forsa rua ne’e iha misaun ketak-ketak ne’ebe PNTL ba seguransa interna, no F-FDTL seguransa ba externa. maibe iha lei organika hateten forsa rua ne’e atu koopera malu hamutuk iha servisu kuandu nesesita, no forsa rua ne’e implementa ona dala barak hodi rezolve país nian.

Nia dehan, seguransa eleisaun PNTL sei hatun ninia efetivu tomak hodi reforsa komando Munisipiu hodi bele asegura eleisaun, patrulhamentu, check point sei la’o maka’as hodi pasa revista ba sasan kroat.

Komisario Julio Hornai afirma liu tan katak, wainhira mosu perturbasaun ruma PNTL labele, sei husu ba Chefi Estadu Maior F-FDTL atu ajuda forsa hodi reforsa iha terenu.

Iha parte seluk Chefi Estadu Maior F-FDTL, Maijor Jeneral, Lere Anan Timur, husu ba lider Partidu Politik (ParPol) no komunidade atu mantein disiplina iha eleisaun Prezidensial no eleisaun Parlamentar tinan 2017 ne’e.

“Ami husu ba lider politik, komunidade atu mantein disiplina, liu-liu ba ParPol, ne’ebé iha relasaun emosional ho artemarsiais. Ami hatene, ParPol KHUNTO iha relasaun diak ho KORK, tanba ha’u mós hanesan asesor KORK ninian, PD relasaun emosional Saudoso Fernando La Sama hanesan Kempo, depois SH ha’u hanoin sira Timor oan ne’ebé tur iha relasoins emosionais, maibe labele konfia katak, imi iha forsa, maibe imi ninia forsa mak PNTL ho F-FDTL,”deklara Lere Anan Timur.

Nia dehan, atu eventu hahu husi kampanha to’o eleisaun la’o diak, lider ida-idak tenke tau as nafatin matenek, maturidade, responsabilidade, nasionalismu ho patriotismu.

Lere Anan Timur haktuir, F-FDTL no PNTL, instrumentu Estadu ninian, kuandu nesesariu Estadu presiza atu uza hodi intervein ordem krimi ka problema ruma mosu iha rai laran wainhita situasaun ruma kria instabilidade ba Estadu iha nasaun.

“Hanesan Primeiru Ministru Rui ninia mensajen dehan katak, jero toleransia la signifika katak, tiru, mas ema kaer kilat hatene wainhira mak atu tiru, instituisaun rua ne’e tun iha terenu, nia atu intervin, signifika kaer ema baku ema hakanek ema, kuandu nesesariu bele mós hasai ema ninia vida, tanba instrument Estadu ninian, la’os Julio mak uza, la’os Lere mak uza atu intevein, Estadu nia instrumentu, ”esklarese Lere. avi

Jornal Nacional Diário

SERVSIU PR TAUR BARAK LIU IHA RAI LARAN

Posted: 28 Feb 2017 02:44 PM PST
Deputadu Paulino Monteiro husi bankada Partidu Demokratiku (PD), haree katak, progresu servisu Prezidenti Republika (PR), Taur Matan Ruak, durante nia mandatu barak liu iha rai laran no la’o diak, maibe la dún halo vizita ba estranjeirus.

“Durante tinan lima ami haree PR Taur nian servisu iha buat balu que susesu ona no la’o diak, por ezemplu iha rai laran ita haree la’o kapas, maibe iha kna’ar balun mak nia seidauk la’o hotu, depois nia ladun fo atensaun ba estranjeirus hanesan servisu sai ba liur vizita ba nasaun seluk ne’e ladun,”dehan Deputadu Paulino Monteiro ba Jornalista sira iha PN Segunda ( 27/2/17).

Deputadu Paulino afirma, tuir los PR halo nia kna’ar vizita ba estranjeirus tenki barak, tanba PR hanesan reprezenta nasaun ba estranjeirus.

“Tuir ami-nia haree katak servisu iha rai laran la’o diak ona. Maibe servisu rai laran mos dala ruma barak liu tiha fali sirvisu ne’ebé mak lolos intrega ba ministeriu sira maka hala’o, maibe Prezidenti Republika mos tun hotu deit ba iha kraik maibe husi parte ida ne’e mos nia rekoñese lalaok sira ne’ebé uluk iha funu atu fo agredesementu ba ita-nia ema sira ne’ebé mak subar prezidenti fo ajuda prezidenti iha rezistensia ne’ebé iha funu 24 anos”esplika Deputadu Paulino.

Entretantu Deputadu César Valente husi bankada CNRT relata tan progresu servisu PR Taur nian durante tinan liman ne’e balun la’o diak no balun la’o latuir konstituisaun.

“Servisu sira ne’ebé Prezidenti nia alkansa balun diak no balun mos la’o latuir ita-nia konstituisaun, tanba ita-nia Prezidenti Republika iha konstituisaun artigu 4 mak fo ba nia atu la’o mak artigu 85, 86, 87 no 88 kona-ba promulgasaun lei ka orsamentu agora 85 ne’e nia kompetensia rasik ,86 kompetensia ba orgaun sira seluk ne’emak polimika ida naton konaba jeneral Lere buat sira ne’e hotu mas tantu ita kontinua iha estabilidade,”dehan nia.car

Jornal Nacional Diário

DESKONFIA TAMA ATAMBUA ILEGAL TNI KAPTURA MEMBRU UPF NAIN RUA

Posted: 28 Feb 2017 02:39 PM PST
Tentara Nasional Indonesia (TNI) iha semana ne’e kaptura membru Unidade Polisia Fronteira (UPF) nain rua (2) iha fronteira, tanba deskonfia tama illegal ba Atambua-Indonesia.

“Ita simu ona relatori husi Komandante UPF katak, ita ninia membru nain rua tama duni Indonesia, nain ida ho dokumentus haruka fila ona, maibe membru nain ida sei iha hela prosesu laran mak oras ne’e iha hela konsuladu Atambua Indonesia,”esplika Komandante Operasaun PNTL, Superentedente Chefi, Henrique da Costa, informa ba Jornalista sira, Segunda (27/02/2017) iha Kuartel Geral Dili.

Nia hatutan katak, tuir relatoriu informasaun husi Komandante UPF katak, TNI kaptura membru UPF ho naran, Aleixo Gudinho no Leonel Martins Belo, la’os tanba lori mina rai ilegal, maibe lori pesa motor. Tantu kona-ba kestaun seluk sei iha hela prosesu investigasaun, tanba ne’e mak seidauk iha justifikasaun lolos.

“Ita orienta ona komandante UPF para mantein komunikasaun ho parte TNI, maibe ita la intervein servisu Migrasaun ninian,”hateten Henrique da Costa.

Kona-ba elementu nain 2 refere ba Atambua iha lisensa husi sira ninia komandante ou lae ne’e, Komandante Operasaun, Henrique da Costa kalrifika katak, atu responde ba kestaun ne’e sei hein relatoriu husi komandante UPF ba asuntu refere.

Tuir publikasaun husi Media Kompas. Com iha edisaun Sesta (24/02/2017) katak, TNI kaptura membru UPF nain 2 refere, lori mina litru 105, depois motor Vixon ninia lampu, e nain tolu ne’e laiha pasaporte,” hateten Normansyah iha Kompas. avi

Jornal Nacional Diário

ME Rekoinese 50% Kondisaun Infransturtura Sei Minimu

Posted: 28 Feb 2017 02:16 PM PST
DILI – Ministeriu Edukasaun (ME), rekoinese too agora 50% kondisaun infrastrutura eskola publilku sei minimu tebes, mesmu eskola balun ME hadia ona, maibe ba oin presiza atu hadia diak liu tan.

Lamentasaun nee hatoo husi vise Ministra Edukasaun (ME), Dulce Jesus Soares hatete, konaba infrastrutura eskola, bele dehan katak, 50% ba leten eskola iha Timor Leste, nee sei iha kondisaun neebe mak minimu tebes, mesmu balun halo ona, maibe se hakarak tuir los padraun neebe mak iha.

Se ita hakarak tuir los padraun neebe mak ita iha katak, plemenus sala ida estudantes 30 too hat nolu, ida nee eskola barak tebes-tebes iha ita nia nasaun neebe mak ita presiza atu halo intervensaun ida makaas tebes-tebes, atu nunee ita bele rezolve asuntu infrastrutura, tanba oras nee dadaun ME halo hela levantamentu dadus neebe mak ita iha, ita hein katak, iha fulan hirak mai sei kompleta dadus konaba nesesidade ba infransturtura hotu-hotu iha ME, ida nee mak mehi boot ida iha ME agora dadaun,” dehan vise ME Dulce ba STL iha salaun Maubara room Timor Plaza Dili, Segunda (27/02/2017).

Vise ME Dulce hatete, too agora eskola publiku barak nia kondisaun seidauk diak, tanba eskola balun too agora nia infrastrutura nee seidauk diak, maibe ba oin pollitika ME atu haree ba iha asuntu infrastrutura eskola neebe mak too agora sai preokupasaun boot iha publiku.

Iha fatin seluk, Direitor edukasaun Munisipiu Dili, Duarte Braganca hatete, koalia konaba infrastrutura eskola, tanba haree katak, eskola publiku sira nee sei menus fatin biblioteka, laboratorium, kondisaun eskola, menus saniamentu no seluk tan. Jacinta Sequeira/Guilhermina Franco

Suara Timor Lorosae

Dili Sai Fatin Prostituisaun

Posted: 28 Feb 2017 02:10 PM PST
DILI – Nasaun Timor Leste oras nee sai hanesan fatin prostituisaun, neebe maka seguru ba ema estranjeiru no Timor oan sira, tanba laiha kontrolasaun diak husi Governu.

Timor Leste foin ukun aan tinan sanuluh resin lima, maibe sai ona fatin neebe maka seguru ba ema estranjeiru no Timor oan sira, tanba laiha kontrolasaun diak husi Governu. Nunee hodi atrai Timor oan balu, tantu husi Dili ba to area rurais hodi involve iha aktividade komersiu prostituta nian.

Tuir deputadu husi bankada PD Paulino Monteiro hateten, Fofoun foin hari Governu, ema estranjeiru sira husi fatin barak mai Timor Leste liu liu Xineza, Indonesia no rai seluk tan mai uza sira nia pasaporte turista, depois halo fali sira nia servisu seluk.

Hanesan liu liu feto sira halao fali aktividade prostituisaun iha rai laran, Tanba nee entidade hotu hotu tenke tau matan ba kestaun ida nee, labele fo kulpa deit Governu. Ema sira nee mai tuir deputadu Paulo katak, dala ruma deskonfia sira lori droga no moras aat hanesan HIV/ SIDA.

Feto estranjeiru hirak nee ita deskonfia sira balu moras HIV/SIDA kona nunee mos balu lori aimoruk hanesan droga mai ita nia rai laran,” dehan deputadu Paulino ba STL, iha PN, Dili, Tersa (28/02/2017).

Nia dehan, feto sira nee fasil subar droga, tanba nee maka iha polisia investigasaun nee halo feto ho feto maka pasa rabista ba malu, tanba sira bele detekta fatin subar droga nee iha neebe. Responde konaba deskonfia Governu maka fo autoriza ema hirak nee tama mai, deputadu Paulo hateten, nee lalos, maibe individu maka hatama ema hirak nee mai hodi hetan subornu.

Iha fatin hanesan membru PN husi bankada CNRT Jacinto Viegas hateten, ema estranjeiru liu liu feto sira neebe maka tama mai iha rai laran halo aktividade prostituisaun iha rai laran nee, tanba kontrolasaun iha lina fronteira ladun maximu. Carme Ximenes

Suara Timor Lorosae

Governu Tenke Kria Kondisaun Promove Kafe Timor

Posted: 28 Feb 2017 02:06 PM PST
DILI – Atu promove kualidade kafe Timor iha rai laran no rai liur maka, governu tenke kria kondisaun, atu nunee kafe Timor neebe kualidade diak nee, bele folin iha merkadu Nasional nomos Internasional.

Tuir Koorenador industria kafe Timor diak, Rogerio Barreto katak, industria kafe Timor diak nee hamrik kleur ona, no problema neebe hasoru iha baze maka susar atu asesu ba merkadu tanba, governu rasik la kria kondisaun atu nunee fasilita industria rai laran nee faan iha loja atu nunee ema husi rai liur mai bele sosa tanba durante nee Timor oan neebe hatene nee maka mai sosa kafe iha nee.

Hau hanoin atu promove diak liu tan ita nia kafe Timor iha merkadu rai laran no rai liur maka, governu tenke kria kondisaun tanba kafe neebe faprika iha rai laran nee ninia kualidade diak, no ami produsaun kuantidade boot maibe ema neebe atu sosa nee naton deit tan nee ladun fo rendementu diak,” dehan Rogerio ba Jornalista Tersa (28/02/2017) iha nia knar fatin Bundaran Comoro.

Nia mos informa liu tan katak, kafe sira neebe maka faan iha nee sosa husi povu agrikultor sira iha baze, sosa lori mai sona, no mesin dulas hodi ense ba faan, plastik boot nee ninia presu U$ 3 dolar too U$ 5 dolar, plastik kiik nee U$ 2 dolar tun fali.

Iha parte seluk Reprezentante povu iha uma fukun Parlamentu Nasional, Deputadu Paulino Monteiro hateten, povu barak maka iha inisiativa atu buka osan rasik maibe, problema neebe maka povu kiik sira hasoru iha baze maka susar atu asesu ba merkadu hanesan industria kafe Timor iha Comoro Bundaran, kafe hada nakonu maibe ema atu sosa nee maka susar. Madalena Horta
Suara Timor Lorosae

Dionisio Babo: CNRT Orguillu Fretilin Kandidata Lu-Olo Ba PR

Posted: 28 Feb 2017 02:02 PM PST
DILI – Sekertariu Jeral Partidu Consellu Nasional Rekontruksaun Timorense (CNRT) Dionisio Babo hatete, CNRT urguillu tanba Fretilin bele kandidata Prezidente partidu Francisco Guterres Lu-Olo ba Prezidente Republika Timor Leste periodu 2017-2022.

Sekjer Partidu CNRT Dionisio dehan, CNRT deside fo apoia ba Kanpres Lu-Olo, tanba lideransa no partidu Fretilin tane interese nasional no unidade nasional.

Ho ambitu unidade nasional maka Prezidente CNRT Kayralla Xanana Gusmao deside CNRT lao tuir, nia hodi vota ba Lu-Olo nudar Prezidente Republika periodu 2017 to 2022,” dehan Sekjer Partidu CNRT Dionisio, liu husi komunikadu imprensa neebe maka STL asesu, Tersa (28/02/2017).

Nia dehan, momentu ida oportunu tebes, bainhira Fretilin bele ofrese oan mane ida neebe tane aas interese nasional, fo nia didikasaun iha ailaran durante 24 anus, no iha sentidu de estadu. Kanpres Lu-Olo tuir Dionisio katak, hanesan lideransa Fretilin neebe hatudu ona nia firmeza, komprende estadu, komprende saida maka unidade nasional, saida maka estabilidade no saida maka povu hakarak.

Iha fatin ketak Kordenador partidu Fretilin Munisipiu Ermera atual deputadu Antonio dos Santos 55 hateten, Preparasaun ba kampana Kanpres Lu-Olo iha Munisipiu Ermera hotu ona, no hein deit iha loron 3 Marsu Kanpres Lu-Olo ba halo abertura kampana ba dala uluk iha neeba.

Deputadu Antonio 55 mos garante katak, kanpres Lu-Olo sei manan maioria iha Munisipiu Ermera, tanba estrutura partidu Fretilin nian iha Munisipiu Ermera metin. Carme Ximenes

Suara Timor Lorosae

Veta Lei PV, CNRT Ho Taur Laiha Relasaun

Posted: 28 Feb 2017 03:42 AM PST

DILI – Relasiona Prezidente Republika, Taur Matan Ruak nia deklarasaun katak, nia sei veta Lei Pensaun Vitalisia (LPV) iha tempu badak no husu CNRT-Fretilin atu labele hirus nian.

Tuir Xefe Bankada CNRT, Deputadu, Natalino do Santos hatete katak, se Prezidente Republika, Taur Matan Ruak veta nee kompetensia nia laiha relasaun ho CNRT.

CNRT atu virus prezidente tanba deit veta, nee laiha relasaun ho CNRT ho kompetensia Prezidente, CNRT hirus konaba saida nian,” dehan Xefe Bankada CNRT, Deputadu, Natalino ba STL iha PN-Dili, Tersa (28/02/2017).

Xefe Bankada CNRT haktuir, Prezidente Republika iha kompetensia tomak atu foti desizaun ba LPV, veta ka promulga tuir lei fo ba nia no nia foti desizaun tuir ninia hakarak. Deputadu Natalino salenta, CNRT partidu ida nakole ba hotu-hotu atu halo dilogu, rona ema hotu, partai bersahabat ho se-se deit apalagi CNRT lagi hirus prezidenre nia komopetensia nee laiha.

Iha fatin hanesan, Deputadu Bankada Fretilin, Paulo Moniz Maia esplika, durante nee Prezidente vizita suku hotu-hotu iha Timor laran tomak nia halo ona kumprimisu ona ho ita nia povu tomak atu veta lei ida nee depende prezidente tanba kompetensia tomak prezidente nian. Raimundo S. Fraga

Suara Timor Lorosae

Isabel: PLP Espiritu Mai Husi Taur Matan Ruak

Posted: 28 Feb 2017 03:38 AM PST
METINARO – Sidadaun neebe sei asimu kargu nudar prezidente republika labele involve iha partidu, maibe Partidu Libertasaun Popular (PLP) nudar partidu neebe espiritu mai husi Taur Matan Ruak.

Tuir Isabel Ferreira nudar kaben husi Taur Matan Ruak atual Prezidente Republika hatete Timor Leste estadu Direitu demokratiku Timor oan hotu iha lei nia okos, tan nee sidadaun neebe sei asumi kargu hanesan prezidente republika labele mete iha partidu.

Sidadaun ida kuandu asumi kargu hanesan Prezidente Republika labele mete Partidu, Agora PLP hau dehan tiha ona, nee espiritu mai husi Taur Matan Ruak,” dehan Isabel ba Jornalista Segunda (27/02/2017) iha Sermitariu Heroi Metinaro wainhira partisipa seremonia intrega plaka saudozu nain 12 husi RENETIL ba Estadu.

Nia hatete depois iha 20 maio 2017 hafoin intrega kargu prezidente ba prezidente eleitu, Taur iha Direitu atu deside involve iha partidu ida neebe maibe PLP espiritu Taur nian.

Hatan kona ba apoiu ba kandidatura Prezidente Republika, Isabel hatete nia parte iha kandidatura neebe sei fo apoiu neebe tempu badak sei deklara ba publiku kadidatura neebe mak fo apoiu. Timotio Gusmao

Suara Timor Lorosae

KSTL REKOMENDA SALARIU MÍNIMU US$ 150

Posted: 28 Feb 2017 02:55 AM PST
Konfenderasaun Sindikatu Timor Leste (KSTL) rekomenda ba Governu atu hasa’e salariu mínimu husi US$ 115 ba 150, tanba realidade moris ohin loron la hanesan uluk.

KSTL propoin aumenta salariu mínimu ba US$150 ne’e tanba folin nesesidade baziku kada fulan sempre aumenta.

Alende realidade moris loron-loron nian karun, KSTL mos husu tenki aumenta salariu mínimu, tanba tempu badak mos sei implementa sistema seguransa sivil ne’ebé hakarak ka lakohi trabalhador hotu tenki kontributiva, signifika katak trabalhador sei kontribui mais ou menus osan ho valor US$ 5, tanba ne’e tenki aumenta salariu hodi trabalhador bele kontribui ba lei seguransa sivil ho montante US$ 5.

“Tanba realidade vida moris agora ne’e la hanesan no sistema seguransa sivil atu implementa iha fulan Abril tinan 2017 ho kontributiva, trabalhador tenki kontribui, se nia gaji mínimu US $ 115 nafatin , nia kontribui tan US$ sekitar lima (5) dolar mak nia simu deit 10 oinsa, nia bele sustenta nia moris,”dehan Sekretariu Jeral KSTL, José da Conceição da Costa ba jornalista sira iha Salaun enkontru Madre Canossa, Becora-Dili, Segunda (27/2).

Sekertariu Jeral KSTL ne’e hatete, ejijensia KSTL atu hasa’e salariu mínimu trabalhador husi US$115 tanba tuir desizaun ne’ebé hasai iha fulan Junho tinan 2012 kona ba salariu mínimu hatete katak tenki halo revizaun ba lei refere iha tinan 2014, maibe realidade laiha revizaun, tanba ne’e KSTL hala’o estudu hodi aprezenta proposta atu hasa’e salariu mínimu husi US$ 115 ba US$ 200, maibe mai iha Konsellu Nasional Trabalho (KNT), la aseita hodi hatun ba US$ 150.

“US$ 150 ne’e mak SEPFOPE agora lori ba iha Ministro Coordenador Estado Asuntu Economico e Ministro Agrikultura e Pescas (MCAE), depois MECAE sei diskuti depois sei bolu hotu ami tanba ami mos tama hotu membru Conselho do Trabalho depois sei lori ba iha Konsellu Ministrus (KM), desizaun tripartida ne’e mak US$ 150 ne’e signifika nia sa’e 30% ne’ebé dala ruma iha KM sei hatun maibe tuir KS labele hatun maibe tenki mantein ho montante US$150,”dehan nia.

“Ami mak ne’e labele mantein tenki aumentu tanba sa? Tanba vida moris agora lahanesan ho uluk, ne’ebé agora ita husu para tenki hasa’e para kobre mos iha sistema siguransa atributu inklui mos bele fo netik vantajen ba trabalhador sira nune’e trabalhador sira bele iha sentimentu katak osan bele sae,”Sekertariu Jeral KSTL ne’e hatete.

Nia hatete, KSTL tenki foti desidi hodi hala’o proposta kona ba aumenta salariu tanba atu hein deit kompañia mak atu hasa’e rasik ne’e nunka atu hasa’e.

“Tanba negosiasaun koletivu entre sindikatu ho empregador ne’e seidauk la’o didiak, buat ida koletivu atu troka akordu individual nian, tanba ne’e KSTL ho inisiativa hala’o análiza hodi hato’o proposta ne’ebé agora sira sei estuda maibe ba ami em prinsipiu tenki s’ae,”dehan José.

Entertantu Ministro Coordenador Assunto Economica e Ministro Agricultura e Pescas(MCAE-MAE), Estanislau da Silva, hatete, proposta kona ba salariu mínimu dadauk ne’e iha ona MECAE ne’ebé MECAE sei halo hela estudu, maibe oinsa atu aumenta salariu tenki haree mos kona ba produtividade.

“Ne’ebé se ita hanoin ona atu aumenta salariu ita tenki haree mos kona ba produtividade no mos tenki haree mos ba ita-nia kapasidade atu kompete ho rai sira seluk ne’ebé mak agora dadauk iha ne’e,”Estanislau da Silva hatete.

Nia dehan, tenki haree kona ba asuntu hirak ne’e uluk tanba bainhira atu tama iha ASEAN salariu mínimu mos sei kompete ho paises ASEAN sira seluk, tanba ne’e MECAE sente iha presaun atu aumenta maibe tenki haree ba kestaun hirak refere.

“Ha’u haree iha presaun para atu aumenta, maibe ita tenki hare’e, ita tenki realistiku ituan, ne’ebé agora dadauk ami haree hela tanba ida ne’e la’os buat ida ne’ebé fasil, maibe ita tenki kaer ho realidade, kaer ho korajen oinsa ita bele halo para bele fo mos protesaun ba ita-nia trabalhador sira,”dehan Estanislau.Ola

Jornal Nacional Diário

JOSÉ NEVES: LABELE “HATUDU DEIT LIMAN” BA ÓRGAUN JUDISIÁRIU

Posted: 28 Feb 2017 02:52 AM PST
Kandidatu Prezidenti Repúblika (PR) periodu 2017-2022, José das Neves “Samala-Rua” hateten, Estadu, Governu no lider sira hotu, labele “hatudu deit liman” (krítika), ba órgaun judisiáriu, maibé hotu-hotu esforsu atu hadia frakeza iha judisiáriu.

Kandidatu Prezidenti Repúblika ho númeru sorteiu 4 ne’e, fundamenta katak, órgaun judisiáriu iha Timor Leste (TL) iha duni frakeza balun, maibé órgaun Estadu sira seluk mós iha ninia frakeza.

“Órgaun judisiáriu iha frakeza duni, maibé órgaun sira seluk mós iha frakeza, ne’eduni responsabilidade ita nian nu’udar Estadu, Governu, lider sira, no públiku la’os krítika de’it, maibé buka dalan atu hadia frakeza hirak ne’e,”esplika José das Neves ba JN-Diário, Segunda (27/02), iha Knua Kandidatu Prezidenti Repúblika Samala-Rua, Rua São Tomé e Príncipe 18 Palapaço Díli, hodi hatan konaba krítika públiku nian ba serbisu órgaun judisiária nian duranten ne’e.

Samala-Rua hatutan katak, ema ne’ebé sai juiz, prokurador, advogadu hetan formasaun liuhusi sentru formasaun judisiária ne’ebé Ministériu Justiça (MJ) mak kaer responsabilidade ba formasaun ne’e, entaun Governu mak tenki hadia formasaun ne’e para bele hadia di’ak liutan serbisu área judisiária nian.

Maibé nia mós rekoñese katak, sersibu órgaun judisiáriu durante ne’e la’os fraku liu, buat balun mós setór judisáriu halo di’ak, tamba ne’e Governu tenki haree sala ne’e iha ne’ebé para bele hadia no ida ne’ebé di’ak eskoraza para sira bele hala’o funsaun ho didi’ak liutan.

“Ida ne’e responsabilidade Estadu no Governu nian, maibé la’os dehan krítika de’it sira buat hotu bele sai di’ak ona. Ita tenki ajuda sira halo buatruma, hadia rekursu humanus, formasaun ema no sistema. Iha mós setór judisiáriu, Ministériu públiku ho Tribunal iha Konsellu Superior Majislatura, órgaun sira ne’e bele tau atensaun. Órgaun ne’e nia kompozisaun mai husi ema lubuk ida ne’ebé balun reprezentante husi Prezidenti Repúblika, Governu, Parlamentu ajuda haree, tamba nia iha estrutura ida ne’ebé bele uza para fó atensaun ba setór judisiária,” José das Neves esplika.

José das Neves mós dehan, órgaun judisiáriu ne’e, órgaun Estadu nian ida mós, ne’eduni hotu-hotu responsabilidade atu hadia.

“Ne’ebé kritika sem útiliza mekanismu ne’ebé mak iha para hadia, ne’e ita la kontribui ba Estadu tamba órgaun judisiária ne’e órgaun Estadu ida hotu, nia la’os órgaun ida ne’ebé hamriik ketak-ketak husi Timor, suporta funsionamentu Estadu husi aspetu legal jurídiku,” Samala-Rua deklara.ías

Jornal Nacional Diário

LEI MAKA FO MANDATU BA TENENTE NO MAIJOR

Posted: 28 Feb 2017 02:39 AM PST
DILI – Diretór Ezekutivu Organizasaun Naun Guvernamentál (ONG) Fundasaun Mahein (FM), Nélson Belo katak lei maka fó mandatu ba Tenente Jenerál Lere Anan Timor ho Maijór Jenerál, Filomeno Paixão.

“Uluk liu ita nia lei ne’e halo definisaun katak ita nia jenerál ne’e to’o de’it brigadeiru, ikus mai ita nia lei halo fali definisaun hodi promulga hasa’e ba to’o Maijór maka komandante boot liu ona. Maibé, agora hasa’e tan ba Tenente. Ida ne’e lei maka fó mandatu,” dehan Nélson ba jornalista sira iha kna’ar fatin Fomento, Comoro, Dili, Kuarta (10/02), relasiona ho mudansa kargu superior F-FDTL hanesan Lere Anan Timur no Filomeno Paixão.

Nélson hatutan, primeiru nomeiasaun iha instituisaun militár iha ne’ebé de’it ida ne’e normál no dadaun ne’e TL adapta ona situasaun ne’ebé maka hatudu ba mondu katak ninia prosesu dezenvolvimentu la’o tuir lei ne’ebé maka iha.

“Ita adapta sistem militár ne’ebé akontese iha mundu. Hanesan jerasaun foun, tenki orgullu hasa’e promosaun deviza ba sira na’in rua,” nia dehan.

Nia esplika katak, sira la’os tentara bayaran para luta ba deviza. Sira luta oinsá povu ne’e bele moris di’ak, nasaun ne’e bele hakmatek. Ne’e natón ba sira. Entaun ba sira hasa’e pangkat ne’e hanesan meius lalaok estadu nian hodi hatudu ba nasaun seluk.

Tanba timor ukun án ona no iha ligasaun ho nasaun seluk, ne’e hanesan imblema situasaun nian maibé ba sira la hare ba pangkat, ne’e hanesan didikasaun husi sira moris tomak no kontinua halo dedikasaun, kompara ho nasaun seluk ne’ebé tenki eskola matenek, tuir treinamentu oin-oin.

Maibé sira na’in rua ne’e matenek mai husi sira nia esperensia mai husi pratika entaun boot liu saida maka ema seluk hetan universitariu.

Nia hatutan kona-ba hasa’e devisa ida ne’e hanesan jerasaun foun ne’e hanesan prosesu birokrasia institusaun estadu nian, ne’e normal akontese. Maibé ba sira na’in rua la’os orgulho ba devisa maibé orgulho ba ukun án, orgulho ba sira maka povu Maoris di’ak no nasaun hakmatek.(Way)

Timor Post

FERNANDA BORGES LIDERA REFORMA FISKAL

Posted: 28 Feb 2017 02:31 AM PST
DILI – Governu fó fi’ar ba eis deputada nu’udar mos Prezidente Partidu Unidade Nasional (PUN), Fernanda Borges, lidera Komisaun Reforma Fiskal (KRF), ne’ebé tutela iha Ministériu Finansas (MF).

Tuir ajenda, KRF sei hala’o konsulta lubuk ida ho parte interesada xave sira to’o fulan Marsu 2016.

Tuir publikasaun iha portal Ministériu Finansas nian katak, hafoin fulan ruma hala’o tiha servisu preparatóriu lubuk ida ho tulun hosi péritu nasional no internasional sira, KRF hahú aprezenta esbosu lei tributária no aduaneira to membru governu no parte interesada sira seluk hodi husu sira ninia komentáriu no feedback.

Péritu nivel altu iha área ida ne’e mai iha Timor-Leste hodi aprezenta sira ninia rekomendasaun no hodi klarifika asuntu no preokupasaun sira ne’ebé iha.

Tópiku sira ne’ebé diskute mesak oin-oin, hahú hosi lei tributária, reforma administrasaun tributária, esbosu lei IVA, reforma impostu rendimentu, kódigu prosedimentu aduaneira no mós planu estratéjiku ba administrasaun tributária.

KRF sei halo konsulta ho Primeiru Ministru, Ministru xave sira, membru Parlamentu Nasional, Presidénsia Républika, representante hosi Kámara Komérsiu, kompañia petrolífera, entidade kontabilístika, advogadu, ONG, konfisaun relijiosa, universidade, partidu polítiku, média no mós organizasaun internasional sira hanesan BDA, FMI, no Banku Mundial.

Reforma Fiskal, aleim de Reforma Jestaun Desenpeñu no Reforma Desenpeñu Orsamental, ninia objetivu prinsipal maka atu asegura sustentabilidade fiskal Timor-Leste nian iha médiu no longu prazu liu hosi atinji balansu ida entre despeza no reseita Estadu nian.

Reforma Fiskal sei kontribui ba aumentu iha reseita naun-petrolífera, no iha tempu hanesan mós fó garantia nafatin ba kontinuasaun komitimentu Estadu nian ba ninia sidadaun sira.

Atu halo ida ne’e, Reforma Fiskal sei hadi’ak no fornese sistema Tributária no Aduaneira Timor-Leste nian ho lejislasaun lubuk ida efisiente, ne’ebé sei tulun Estadu hodi kolekta reseita nesesária sira hodi implementa no atinji Estadu ninia misaun no mós atu moderniza no konsolida administrasaun Tributária no Aduaneira Timor-Leste nian liuhosi modernizasaun sistema IT no hadi’ak sistema no prosedimentu sira.(*)

Timor Post

Alunus besik 270 tama iha unidade 1ª formasaun superior téknika iha sul Timor-Leste

Posted: 28 Feb 2017 02:13 AM PST
Besik estudante 270 tau-naran ona iha kursu ba produsaun animál no konstrusaun sivil ne’ebé loke tinan ne’e hanaran Institutu Politékniku Betano, unidade dahuluk hosi ensinu superiór iha kosta sul Timor-Leste, ne’ebé inaugura iha semana kotuk.

Institutu ne’e harii iha rejiaun Betano, munisípiu Manufahi (sul nasaun nian), zona ida ne’ebé ho investimentu públiku boot hosi Governu no agora dadauk sei harii hela refinaria dahuluk Timor-Leste nian.

Institutu foun ne’e oferese formasaun téknika iha área Agrikultura, Pekuária no Enjeñaria, hodi bele kapasita joven timoroan sira ba atividade profissionál ho area oioin , informa Governu iha komunikadu.

Par hosi kursu rua ne’e ba tinan ne’e sei prepara formasaun ba Enjeñaria Mekánika, Enjeñaria Elétrika, Alimentasaun no Produtu Agríkola, Saúde Animal no Silvikultura.

Intervein iha inaugurasaun ne’e, primeiru-ministru Rui Maria Araújo konsidera katak investimentu iha edukasaun no formasaun apoiu ba harii sosiedade ida forte, ba abertura Institutu ne’e hakat tan pasu ida atu prepara joven timoroan sira hodi partisipa ho forma efetivu iha dezenvolvimentu nasionál, tuir komunikadu.

Infraestrutura ne’ebé ohin loron IPB komesa harii iha 2013 hosi inisiativu Universidade Nacional Timor Lorosa’e (UNTL) maibé prosesu formalizasaun politékniku hahú iha tinan kotuk .

Akordu ida entre UNTL no Governu viabiliza ba instalasaun IPB ho infraestrutura ne’ebé agora sei akolla ba dahuluk alunus 270, selesionadu entre finál janeiru no inísiu fevereiru nian ne’ebé sei hahú ninia formasaun ho ” tinan preparasaun ba reforsu iha matéria jerál”, tuir Ministériu Edukasaun.

Oferta formativu IPB nian hala’o kona-ba sektór primáriu – agrikultura no pekuária – no enjeñaria, engloba eskola superior rua: Escola Superior Agronomia e Zootécnica e a Escola Superior de Ciências da Engenharia.

Aprova hosi Governu iha setembru 2016, institutu foun inklui iha esforsu Governu nian atu “promove setór politékniku no universitáriu ho efikás” no kria oportunidade ba joven sira atu simu “ensinu ho kualidade” no partisipa iha konstrusaun nasaun nian.

Aléinde konkretiza objetivu Planu Estratéjiku Nasionál Edukasaun 2011-2030, IPB kumpre moos objetivu Governu nian atu dessentralizasaun servisu, fó ba alunu hosi rejiaun sul nasaun nian asesuba formasaun tékniku superior iha “karreira profissionál ho sektor ne’ebé potensial ekonómiku boot liu iha nível rejionál no nasionál”.

“Ho forma ne’e, kontribui ba diminuisaun éxodu rural no ba dezenvolvimentu ida ne’ebé transversal liu territóriu nasionál hotu “, tuir Governu.

Betano hanesan zona sentrál ida ba projetu boot koñesidu hanesan Tasi Mane, n’ebé envolve dezeñu no konstrusaun Baze Apoiu Suai no konsidera hosi Governu hanesan essensiál ba atividade esplorasaun petrolíferu Tasi Timor.

Projetu ne’e inklui konstrusaun ba refinaria petroleum ida iha Betano hodi prosessa kondensadu ne’ebé importa no produz kombustível no derivadu seluk petroleum nian, 80% hosi sira ne’ebé esportadu.

SAPO TL ho Lusa – Foto: GPM

Governu timoroan lakomenta relatóriu komisaun parlamentar ne’ebé seidauk simu

Posted: 28 Feb 2017 02:10 AM PST
Governu timoroan iha ohin konsidera “desesionante” ba ” informasaun ne’ebé sai” kona-ba relatóriu parlamentar relativu ba dívida tinan uluk, ho konteúdu rekuza komentáriu tanba seidauk simu ” ho formál”.

“Serbisu Komisaun no prosesu resposta ba relatóriu ne’e hanesan kestaun governasaun di’ak no prepara diálogu produtivu ida. Interrupsaun prosesu ne’e ho informasaun ne’ebé sai liuhosi kobertura komunikasaun sosiál ne’e triste tebes”, refere portavós Governu, ministru Estadu Agio Pereira, iha komunikadu ne’ebé haruka na Lusa.

“Governu labele halo komentáriu ba relatóriu ida ne’ebé laiha oportunidade atu reve no fó atensaun hotu maka merese bainhira simu ona”, afirma iha testu hanesan.

Lusa fó sai iha loron 22 konteúdu hosi relatóriu ne’ebé prepara hosi “Komisaun Eventual Parlamentu Nasionál ba Supervizaun no Akompañamentu Prosesu Likidasaun Dívida Estadu nian”, ne’ebé maka konklui ona maibé seidauk publika sai.

Husu iha altura ne’ebá komentáriu relasiona ba ezekutivu, nomós komunikadu iha ohin reasaun ofisiál ezekutivu nian ba material ne’e.

Relatóriu ne’e refere katak Governu to’o 2016 iha dívida pelumenus dólar millaun 83,23 ( euro millaun 79) relasiona ba projetu emerjénsia ne’ebé realiza iha 2013, projetu eletrifikasaun no s obra sira seluk.

Realidade identifika ona dívida ho dólar millaun 29,74 ba programa eletrifikasaun nasionál, iha millaun 20,57 ba projetu 64 pakote rua (A no B) hosi programa emerjénsia 2013 no dólar millaun 32,93 referente ba situasaun ” emergénsia sira seluk”.

Iha komunikadu ne’ebé ohin fó sai Governu esplika katak divulgasaun konteúdu ” akontese molok Governu iha oportunidade atu haree relatóriu ne’e, reve ninia númeru no rekomendasaun ka troka informasaun ho Komisaun kona-ba konteúdu dokumentu”.

Ezekutivu, nota testu ne’e, “valoriza serbisu komisaun nian, (…) kolabora ho komisaun no hein ho espetativu asesu formál ba konteúdu relatóriu ne’e”.

Rekorda katak mandatu komisaun nian, ne’ebé termina iha 31 janeiru, ho eskluzivu “akompaña no fiskaliza prosesu apuramentu dívida tinan hirak liubá atu selu liuhosi ámbitu programa investimentu inklui Orsamentu Retifikativu 2016 nian”.

Sai moos hanesan mandatu “identifika risku envolvidu iha jestaun ba projetu no kontratu ne’ebé halo situasaujn kustu adisionál iha projetu no obra inklui iha programa Fundu Infraestrutura, ho realizasaun iha 2016” no ikus mai husu plenáriu “medida nesesáriu atu assegura kumprimentu ba lei, hanesan rezultadu verifikasaun ba prosesu kompensasaun no likidasaun dívida, ne’ebé realiza hosi Governu”.

Ezekutivu ne’e esplika katak Ministériu Obras Públikas, Transporte no Komunikasaun haruka ona kópia dokumentu hotu ne’ebe husu hosi Komisaun “maka legalmente iha sira nia kontrolu no inkluí iha mandatu Komisaun ne’e nian”.

Esklaresimentu adisionál presta hotu ona ” ho ibun” hosi ministru Obras Públikas, Transporte no Komunikasaun no hosi vise-ministru Finansa nomós funsionáriu aas iha administrasaun públika.

Fonte parlamentu konfirma ba Lusa katak relatóriu ne’e lori líder bankada halo ona konferénsia, ba agora seidauk iha ajenda ba ninia aprezentasaun no debate iha plenáriu.

SAPO TL ho Lusa
You are subscribed to email updates from TIMOR AGORA.
To stop receiving these emails, you may unsubscribe now. Email delivery powered by Google
Google Inc., 1600 Amphitheatre Parkway, Mountain View, CA 94043, United States

Please follow and like us:
error