10.5.19 timor agora

TIMOR AGORA

Mídia Sosiál Fó Ameasa Ba Unidade Nasionál

Posted: 09 May 2019 09:37 PM PDT

DILI, 9 maiu 2019 (TATOLI) – Prezidente Parlamentu Nasionál, Arão Noé de Jesus Amaral, hateten espansaun mídia sosiál sira hakoi tiha mídia tradisionál sira hanesan jornál, rádiu, televizaun, revista, tanba mídia sosiál hamosu dezafiu ba serbisu jornalista nian.

Tuir Arão, informasaun ne’ebé mídia sosiál habelar la tuir padraun jornalístika ne’ebé fó ameasa ba demokrasia no unidade nasionál.

“Ezisténsia hosi mídia sosiál iha tinan 10 resin, barak liu sai fonte katak informasaun ne’ebé sira habelar hosi mídia sosiál la tuir padraun jornalístika no rekizitu balun jornalizmu nian. Realidade, mídia sosiál sai fonte informasaun ne’ebé informativu maibé sai fatin halo propaganda falsu, ajitasaun, defama ema, ne’ebé fahe ita-nia sosiedade, fó ameasa ba demokrasia no unidade nasionál,” nia dehan liuhusi ninia deskursu iha konferénsia internasionál Dili Diálogu Forum ba daruak ho tema prinsipál “Sosiál Media: Challenges of Jornalism and in The Modern Society”, iha salaun São José, Katedrál, Dili, kinta (9/5/2019).

Tanba ne’e, Prezidente Parlamentu Nasionál husu ba mídia komunikasaun sosiál sira ne’ebé eziste iha Timor-Leste no legalmente atu halo sira-nia funsaun di’ak liu-tan, liuliu jornalista sira tenke halo serbisu ekstra atu halo counter ba desiminsaun informasaun sira ne’ebé falsu no la tuir kritériu no prinsípiu jornalizmu nian iha mídia sosiál.

Nia garante katak Estadu Timor-Leste (TL) iha tiha ona enkuadramentu legál iha área jornalizmu no komunikasaun sosiál nian, liuhusi lei komunikasaun sosiál Nú. 5/2014, loron 19, fulan-novembru, ne’ebé garante serbisu jornalista sira. Lei refere sei asegura órgaun komunikasaun sosiál sira ne’ebé eziste iha TL no asegura independénsia mídia ne’ebé livre hosi intervensaun hosi parte polítiku.

Tanba, Arão informa, lei komunikasaun sosiál fó liberdade publikasaun ba meiu komunikasaun sosiál sira maibé liberdade imprensa sei hetan limiti sira iha direitu kona-ba onra, privasidade no segredu Estadu nian, hanesan sita iha artigu 11 hosi lei komunikasaun sosiál.

“Lei komunikasaun sosiál la fó limitasaun ba liberdade imprensa iha artigu 11 hosi lei komunikasaun sosiál, maibé liberdade imprensa hetan limiti sira iha direitu kona-ba onra, naran di’ak, reputasaun, privasidade no prezunsaun inosénsia (inosente to’o hetan kondenasaun), segredu justisa no segredu Estadu nian,” nia tenik hodi sita konteúdu artigu 11 hosi lei komunikasaun sosiál ne’e ho lian portugés.

Jornalista: Cancio Ximenes | Editór: Xisto Freitas

Imajen: Prezidente Parlamentu Nasionál, Arão Noe de Jesus Amaral. Imajen António Gonçalves

Mídia Sosiál Dezafiu Ba Jornalista

Posted: 09 May 2019 09:27 PM PDT

DILI, 9 maiu 2019 (TATOLI) – Konsellu Imprensa Timor-Leste (CI-TL, sigla portugés), ohin, organiza konferénsia internasionál Dili Diálog Forum ba daruak ho tema prinsipál “Social Media: Challenges in The Modern Society”.

Intensaun boot liu hosi Dili Diálogu Forum ne’e oinsá maka estabelese mekanizmu ida ba konsellu imprensa iha Ázia Pasífiku atu fahe esperiénsia no halo kooperasaun para bele tau matan di’ak liu-tan ba liberdade imprensa ho liberdade espresaun.

“Tinan ida ne’e tema ba liu mídia sosiál tanba ita haree tinan rua ikus ne’e ita-nia jornalista profisionál sira hetan ameasa boot hosi mídia sosiál. Sé maka lais liu, ema hetan ida ne’e. Dalaruma ita mídia mainstream ida ne’e hetan kompetisaun boot tanba plataforma mídia sosiál barak lahalimar no ema hotu-hotu tau informasaun iha ne’ebá,” dehan Konsileiru Konsellu Imprensa ba asuntu Dezenvolvimentu Mídia, Hugo Fernandes, ba jornalista liuhusi entrevista ne’ebé halao hafoin abertura ba Dili Diálogu Forum iha salaun São José, Katedrál, Dili, kinta (9/5/2019).

Nia hatutan, jornalista sira ne’ebé mak serbisu iha mídia profisionál sai preokupasaun no públiku atu hetan informasaun ida ne’ebé kredível ne’e mak ida ne’ebé loos. Ida ne’e sai kompetisaun boot tanba mídia sosiál bele bele lori ameasa, tanba informasaun sira ne’e la liu hosi mekanizmu jurnalístiku ida ne’ebé di’ak.

“Entaun, laiha karik klarifikasaun. Laiha cover both side (balansu). Laiha étika ida ne’ebé hakerek ida ne’e, tan ne’e sai ameasa boot ba ita-nia sosiedade rasik. Relasiona ho kestaun ne’e maka ami foti asuntu ne’e nu’udar tema ba tinan ida ne’e,” nia hateten.

Hugo informa, ameasa mídia sosiál ida ne’e la’ós sai de’it Timor-Leste nia preokupasaun maibé kuaze iha rejiaun ida ne’ebé boot iha mundu tomak.

Atu regula mídia sosiál iha Timor-Leste, nia hatutan, iha tinan kotuk konsellu imprensa halo ona nota intendimentu ida ho Autoridade Nasionál Komunikasaun (ANC-sigla portugés) tanba ANC maka fó lisensa ba operadór telekomunikasaun sira.

“Mídia sosiál sira uza plataforma ne’ebé maka kompañia operadór telekomunikasaun sira fornese. Proseu la’o hela. Hosi ANC halo ona. Ema hotu-hotu tenke rejistu sim card para depois aban bainrua bele tracking. Iha ne’e, sira sei hatene, sé maka lansa hoax ka fake news (informasaun falsu),” nia esplika.

Aleinde ida ne’e, nia informa, Konsellu Imprensa mós lansa tiha ona matadalan ba mídia online ne’ebé profisionál. Agora, nia hatutan, konteúdu hosi mídia sosiál ne’e maka tenke hamosu lei ida kona-ba IT (information technology). Atu halo lei IT ne’e, tuir nia, tenke konsulta kle’an ba parte hotu-hotu para fake news ne’e labele impede fali ema-nia liberdade espresaun.

Jornalista: Cancio Ximenes | Editór: Xisto Freitas

Imajen: Konsileiru Konsellu Imprensa ba asuntu Dezenvolvimentu Mídia, Hugo Fernandes

PNTL Hasai Ona Despaixu Asegura Estabilidade To’o Munisípiu

Posted: 09 May 2019 09:18 PM PDT

DILI, 09 maiu (TATOLI) – Komandante Jerál Polísia Nasionál Timor-Leste (PNTL), Komisáriu Faustinho da Costa, hasai ona despaixu ba Komandu PNTL munisípiu hotu inklui Rejiaun Autónoma Espesiál Oé-cuse Ambeno (REAO) atu asegura estabilidade durante oras 24.

Komandante Faustinho kontinua kaer metin ninia promesa asegura siguransa ba povu atu livre hala’o atividade iha tempu kalan to’o loron nu’udar planu prioridade iha nia mandatu.

Faustinho dehan mezmu iha asidente no insidente ki’ik balun kontinua mosu iha Dili to’o munisípiu sira, maibé la implika ba estabilidade.

“Despaixu orientasaun la’o ona. La’ós de’it iha kapitál Dili, maibé tún to’o munisípiu hotu atu garante seguransa,” nia dehan ba jornalista sira iha Palásiu Prezidente Nicolau Lobato, Bairru Pité, Dili, kinta (09/05).

Tuir nia katak iha Dili no munisípiu hotu-hotu númeru polísia sufisiente serbisu hamutuk ho autoridade lokál hametin liu-tan seguransa.

Iha tempu besik, Faustinho informa, Komandu PNTL sei hamutuk ho Ministru Interiór Interinu, Filomeno da Paixão de Jesus sei aprezenta planu asegura siguransa oras 24 ba públiku hodi deskuti ninia mekanizmu iha reuniaun Konsellu Ministru.

Nia salienta, Komandu PNTL mós sei hafoun estrutura ba pozisaun komandante balun tuir irárkia lei komandu nian, ne’ebé sei aprezenta ba governu hodi haree ba planu redusaun kada unidade polísia iha Komandu PNTL.

Jornalista: Eugénio Pereira | Editór: Xisto Freitas

Imajen: Komandante Jerál PNTL, Komisáriu, Faustinho da Costa. Imajen António Gonçalves

Tempu ne’ebé ladi’ak iha Timor-Leste estraga estrada ho ponte sira iha rejiaun oriental

Posted: 09 May 2019 09:11 PM PDT

Tempu ne’ebé aat iha rejiaun oriental Timor-Leste nian halo udan boot, ne’ebé estraga ona estrada oioin, balun iha sentru nasaun nian, hatete hosi rezidente sira ba Lusa.

Imajen sira ne’ebé divulga hosi rezidente sira hatudu estraga sira iha zona Laga, iha súl Baucau nian, sidade boot daruak iha nasaun, ne’ebé udan halo nível bee nian aumenta iha mota ida, halo estraga maka’as ba estrada ida hodi halo susar halo pasajen.

Udan estraga ona asesu ida ba ponte Ira Bere, ne’ebé atravesa mota Irabiri, iha fronteira hosi munisípiu sira Viqueque ho Lautem, besik iha kosta-súl nasaun nian.

Ligasaun prinsipal hosi Lospalos ba Díli, iha zona hosi postu administrativu Lautem, sai susar tanba tahu ho udan ne’ebé halo karreta sira iha susar hodi bele liu, susar liu ba autokarru sira.

Iha zona hosi estrada prinsipal, besik iha Lospalos, udan boot halo inundasaun ne’ebé tenki hapara pasajen hosi karreta sira. Populasaun sira iha zona Fui Luro (Lospalos), iha ponta leste nasaun nian, hatete katak iha udan ne’ebé maka’as ho udan boot, ho bee nakonu ne’ebé ameasa ponte lokal ida.

Ligasaun entre Viqueque ho Beasu, iha súl, afetadu mós no kamioneta ida prezu iha mota ida, ne’ebé nia volume bee aumenta maka’as tanba udan ne’ebé tuun iha oras 24 ikus ne’e.

Informasaun meteorolójiku sira ne’ebé atualizadu akompaña hela hosi meteorolojista sira Nofiano Ruas, Natividade Rodrigues ho Flaviana Fernandes, Timor Leste MeteoClima (TLMC), hamutuk ho Diresaun Nasional Meteorolojia ho Jeofízika (DNMG).

Iha boletin tékniku ne’ebé haruka ba Lusa, TLMC/DNMG esplika ona katak sistema presaun ki’ik, ne’ebé forma ona dezde loron-tersa, aumenta ba nível depresaun tropikal no kontinua aumenta iha zona leste Timor-Leste nian.

“Sistema persisti nafatin iha tasi Timor nian (besik hosi kosta Tutuala ho Lautém), ho anin sira iha velosidade média 55 km/hho rajada to’o 80 km/h. Iha posibilidade katak sistema ne’e sei aumenta ba nível tuirmai, tempestade tropikal nian, iha oras neen oinmai”, refere hosi boletin.

Previzaun ba loron-kinta ho loron-sesta maka udan boot sei kontinua iha zona leste iha kosta-súl nasaun nian, ho volume ida udan nian to’o 300 milímetru (mm) loron-loron.

“Ne’e reprezenta posibilidade hosi risku boot ida ba populasaun sira ne’ebé hela iha área sira ne’ebé maka mensionadu ne’ebé bele hasoru dezastre sira hanesan erozaun, inundasaun ho seluk tan”, indika.

Iha alerta anterior, DNMG hatete katak sistema presaun ki’ik sei kontinua aumenta, ho anin sira ne’ebé bele to’o 60 km/h, ho rajada to’o 118 km.

Iha rede sosial Facebook, DNMG husik “alerta máximu” ida ba komunidade sira iha zona leste nasaun nian, liuliu iha munisípiu sira Lautem, Baucau ho Viqueque hodi bele atenta ba inundasaun sira ka ba impaktu hosi udan ne’ebé maka’as.

TLMC hanesan organizasaun ida ne’ebé harii hosi grupu ida meteorolojista timoroan sira ne’ebé maka simu graduasaun iha Universidade Estadual Paulista (UNESP) iha São Paulo.

Lusa | SAPO TL

You are subscribed to email updates from TIMOR AGORA.
To stop receiving these emails, you may unsubscribe now.
Email delivery powered by Google
Google, 1600 Amphitheatre Parkway, Mountain View, CA 94043, United States
Please follow and like us:
error