Buat sira hanesan ne’e bele akontese, ida ne’e laiha dúvida. Udan boot bele halo rai halai, estraga estrada, no provoka estragu barak tan. Maibé oinsá mak ita, liuliu ita-nia Governante sira, bele toma kuidadu aas liu tan atu prevene ka minimiza estragus sira ne’e? Ida ne’e mak ita nia dezafiu.

Ba projetu boot sira hanesan ne’e, normálmente presiza estudu ida kle’an atu koñese loloos kondisaun jeolójika, klimátika, sósio-kulturál, no fatór seluk tan, ne’ebé bele afeta infrastrutura ida hanesan estrada nia kualidade no durabilidade.

Tmor-Leste, nasaun ida ho rekursu finanseiru ne’ebé limitadu tebes, laiha espasu barak atu komete erru. Kada erru ita komete signifika osan, ne’ebé tenke lakon tan; osan ne’ebé ita bele uza ba buat importante sira seluk hanesan edukasaun ho saúde.

Tan ne’e ita tenke investiga didi’ak, tansá estrada ida ne’ebé ita halo ho kustu ida aas, bele monu lalais de’it. Ita presiza identifika frakeza iha sistema ho prosesu hotu-htou ne’ebé ita uza hodi rezulta iha projetu ho kualidade ida hansan ne’e.

Se estrada ida ke tuir loloos halo ho kualidade aas mak la bele tahan to’o tinan ida, sá tan ho estrada sira seluk? (Hanesan foin horisehik, estrada ba Ainaro, iha parte Aituto nian, komesa halai tanba udan).

Sa ida tan mak ita bele aprende husi dezastre ida ne’e hodi bele prevene iha futuru? Oinsá ita bele hasa’e liu tan kualidade no durabilidade ba estrada sira seluk ne’ebé ita sei konstroi iha futuru?

Mai ita hanoin hamutuk!