timor agora 28/2/17

TIMOR AGORA

TAUR BELE BA PM IHA 2017
CCTV BELE MINIMIZA KRIMINALIDADE URBANA…?!
Fretilin Kestiona Funsionamentu Korum Plenaria
Setor Privadu Apoiu Reforma Fiskal
Dom Virgilio, Husu Kampres 8 Respeita Malu no Prontu Simu Rezultadu
Julgamentu ba portugés retidu iha Díli durante tinan rua liu sei hahú iha tersa-feira
Sosiedade Sivil Konsidera Taur Susesu Programa
Kanpres Labele Husu Pensaun Vitalisia Ba Estadu
ANTONIO KALOHAN OPTIMISTA SEI HETAN KONFIANSA POVU SAI PR
ASANAMI-ANTONIO CONCEIÇÃO LIDERA PD BA PERIODU 2017-2021
PM RUI: ESTUDANTE MAKA HEROI LIBERTA POVU
PN DISKUTI ONA LEI ARTISTA TL, KOPIA MÚZIKA EMA NIAN HETAN KASTIGU

TAUR BELE BA PM IHA 2017

Posted: 27 Feb 2017 04:06 PM PST
Figura potensial no akomodativu hanesan Prezidenti Republika (PR), Taur Matan Ruak, iha biban duni atu lidera hikas Governu nudar Primeriru Ministru iha periodu foun 2017-2022.

Padre Paroquia Ainaro, Armindo Brito, reafirma katak, ho esperensia Taur nian durante assume kargu Prezidenti Republika, ne’ebe konsege la’o halibur komunidade suku 442 hatene momos ona saida maka povu nia halerik no hakarak. Nune’e, wainhira Taur ba sai PM bele haktuir iha programa Governu nian ba prosperiedade nasaun no povu nian.

Durante ne’e, PR Taur rona komunidade sira nia halerik, tanba ne’e, wainhira biban naton Taur ba sai PM bele responde ba situasaun ne’ebe komunidade sira infrenta iha sira ninia moris lor-loron.

“Nudar sidadaun, hau fiar katak Nai Maromak sei apoiu foti Taur Matan Ruak ba Primeiru Ministru hodi bele hala’o buat barak liutan atu responde povu nia halrik no mata wen,” hateten Pe. Armindo Brito.

Amo Armindo klarifika katak, persepsaun ninian ba figura Taur la’os aktu kampanha politiku, maibe nudar eperansa hanesan ema sidadaun simples ne’ebe iha direitu no liberdade.

“Knar Konstitusional PR nian la bele halo servisu ezekutivu, tanba ne’e, hau fiar se Taur ba PM maka nia sei halo buat barak ba povu nia diak,” hateten Amo Armindo iha nia intervensaun ba dialogu ho PR Taur Matan Ruak, iha Suku Ainaro Vila, Postu Adminsitrativu Ainaro, Munisipiu Ainaro, Sesta (24/02/2017).

Rona tiha lia hirak husi Amo Armindo ne’e, PR Taur lia tun dehan, nia parte prekorente no elojia no regista ema hotu satan hanesan Amu fo perguntas ne’e, maibe nia parte la bele responde maibe atu hatete deit iha dezafiu.

“Hau hakarak dehan deit, hau regista Amu nia liafuan, maibe hau labele halo persepsaun, hau agradese ba liafuan sira ne’e, só bele hatete realmente ita tenke iha dezafiu,” hateten PR Taur.

PR Taur dehan wainhira iha debate ho maun Lu-Olo konaba relasaun Estadu ho Igreja ne’ebe maun Lu-Olo defende parseria ou la defende aliadu.

“Tanba hau mate ita boot mos mate, moris-moris hotu no mate rai kuak ida deit, Governu ho igreja la’os aliadu maibe parseiru, no Estadu Timor komunga solidaridade humanismu ne’e sensiabilizasaun, iha 2015 hau halo diskuti problema boot iha Parlamentu, hau hatete ba Governu ho Parlamentu hau iha deferensia ho imi iha buat rua,” hateten PR Taur.

Taur hateten, buat rua ne’ebe esensial liu ba nia no diferenti ho PN sira maka, nia tau respeitu nafatin no boot tebes ba valores kulturais Inan –Aman sira nian hodi moderniza la’o ho pasu foun no respeitu diginidade povu nian ne’ebe fiar iha Santa Kreda Katolika.

Antes ne’e Amo Armindo Brito mos mensiona katak, Prezidenti Republika foun ba peridu 2012-2027 tenki alkansa povu nia mehi ba moris diak, tanba ukun-an hetan ona, maibe moris diak seida’uk hetan.

“Hau nia liafuan ne’ebe mak hau atu hato’o, hanesan ohin Prezidenti hato’o ita Timor hotu-hotu tenke unidos, ita hotu tenke sai ida deit atu alkansa ita nia mehi ba moris diak ne’ebe agora ita seida’uk hetan, ukun-an hetan tiha ona, maibe moris diak seida’uk hetan,” hateten Amo Armindo Brito. eus

Jornal Nacional Diário

CCTV BELE MINIMIZA KRIMINALIDADE URBANA…?!

Posted: 27 Feb 2017 04:03 PM PST
Jornal Nacional Diário, editorial

Goverenu Timor Leste Kinta feira nee inagura sistema kontrola kamera Close Circuit Television (CCTV) nebe monta iha fatin sira nebe fital iha Kapital Dili hodi kontrola situasaun iha sidade Dili laran iha tempo loron no kalan.

CCTV sei fasilita servisu Polisia Nasional Timor Leste (PNTL) hodi monotoriza movimentu no akontesimentu iha fatin-fatin nune’e hafasil identifika wainhira mosu problema ka kazu ruma.

Fatin sira nebe CCTV monta ona mak parte Tasitolu selamat datang, Comoro, Pantai-Kelapa, Mandarin, Colmera, Bairo-Pite, Balide, Audian, Culuhun, Becora, Taibesi, Metiaut, Palacio Nobre Lahane no area seluk tan ne’ebe mak importante.

“Sistema CCTV ne’ebé mak ohin (horseik) ita inagura ba ambitu seguransa bele apoiu kombate terrorismu, kriminalidade, em geral, monitorijasaun trafiku iha via sidade Dili ou asidente tranzitu, situasaun ne’ebé ho artemarsiais ka rama ambon,”Komandante PNTL, Komisariu Julio Hornai.

Ho montajen kamera CCTV iha Dili laran nee nudar pasu ida nebe konkretu konaba desenvolvimentu iha rai doben ida nee, li-liu servisu polisia nian atu kontrola situasaun iha kapital Dili iha loron no kalan liu husi kamera sira nee.

Durante nee mosu asidente trafigu, nebe dala balu autor halai lakon, kriminalidade, li-liu rama ambon nee makaas los, autor la kaptura, neebe Publiku hein katak ho kamera CCTV nee bele minimiza krime no fasil atu identifika autor krime sira nee.

Agora duvida mak nee, karik CCTV iha ona ne’ebe polisia la presiza ona halo opersaun iha kalan? Inetelejen sira la presiza ona? lae. Polisia kontinua halao servisu hanesan bai-bain, opersaun lao nafatin hodi kontrola situasaun, li-liu fatin sira nebe CCTV seidauk monta.

Nunee mos ba komunidade sira, hahu ohin ba oin, karik ita lasenti polisia kontrola hela ita, polisia hatene hela saida mka ita halo iha fatin sira nebe kamera monta ba.

Ne’ebe tenki komporta an, labele halo buat nebe kontra lei no orden, labele halo krime, se halo krime, polisia fasil halo indetifikasaun no kapturasaun. CCTV nee laos fasilita deit servisu polisia nian maibe fasilita servisu teruibunal sira wainhira kazu ruma nebe tribunal presiza evidensia, bele referensia ba video ka gravasaun CCTV.

Montajen kamera CCTV nee, karik ema balu la gosta maibe ba publiku em jeral, ba ema sira nebe hakarak moris hakmatek, hakarak moris siguru, senti agradese ba governu, li-liu Ministeriu Interior nebe instala CCTV sira nee. *

Jornal Nacional Diário

Fretilin Kestiona Funsionamentu Korum Plenaria

Posted: 27 Feb 2017 03:46 PM PST
DILI – Bankada Fretilin iha Uma Fukun Parlamentu Nasional kestiona funsinamentu korum plenaria iha Parlamentu Nasional, tanba deputadu balu sempre tama tarde.

Vise bankada Fretilin deputada Josefa Pereira Soares hateten, jeralmente iha Segunda no Tersa feira nee deputadu sira iha informasaun barak ke atu hato, maibe informasaun hirak nee tunda tunda ba bebeik loron seluk somente tanba deit korum.

Ita iha Segunda no Tersa feira nee iha informasaun barak ke ita atu hato, maibe informasaun sira nee ita tunda tunda ba bebeik loron seluk somente tanba deit korum,” dehan deputada Josefa, iha plenaria, Segunda (27/02/2017).

Deputada Josefa mos iha hanoin katak, Parlamentu Nasional nee maka iha atensaun oituan karik iha artigu kuarenta seis du rejimentu nee dehan, plenaria nee hahu novi oras, maibe ho atrazu informasaun neebe maka importante neebe maka atu bele hato iha uma fukun ida nee.

Iha fatin Xefi bankada CNRT deputadu Natalino hateten, problema ida nee abitu tiha nee, maibe problema hirak nee tanba deputadu sira mesak ema politiku hotu.

Entretantu Prezidente Interinu Parlamentu Nasional Duarte Nunes hateten “Hau hanoin ita hotu presiza hare fila fali ba ita hotu nia komprimisiu, atu ita hahu oras neebe maka marka, maibe nee hau maka lider, mais Prezidente maka lider nee ita oin seluk fali ona,” dehan PR Interinu PN Duarte. Carme Ximenes

Suara Timor Lorosae

Setor Privadu Apoiu Reforma Fiskal

Posted: 27 Feb 2017 03:41 PM PST
DILI – Setor privadu apoiu politika VI governu konstitusional neebe reforma fiskal, atu halo diversifika ekonomia hodi dudu kresementu ekonomia lao ba oin.

Diretor Ezekutivu CCI-TL Nuno Trindade hatete atu halo reforma fiskal hodi fasilita emprejariu nasional no investidor sira halo investimentu iha rai laran, bele kontribui taxa ba estadu no loke kampu servisu ba Timor oan.

Ami apoiu tebes, politika governu nian, halo reforma fiskal, tanba bele fasilita emprejariu halo investimentu iha rai laran ho diak,’’dehan Nuno ba STL, Kinta (23/02/2017) iha knar fatin Akait.

Nia hatete, Timor Leste (TL) depende reseitas minarai no gas, ohin loron mina folin tun, produsaun mina Bayu Unda menus, buka alternativu husi reseitas seluk liu husi dalan investimentu iha setor oin –oin neebe potensial TL.

Camara Comersiu Industria Timor Leste (CCI-TL) hanesan mahon ba emprejariu hotu, apoiu tebes politika governu nian, reforma fiskal, maibe wainhira lei diskusaun tenke halo konsultasaun ba setor privadu sira, inklui sosiedade sivil hotu, oinsa fo opiniaun hodi tau hamutuk iha pakote reforma fiskal, para aprova fo benefisiu ba sidadaun hotu.

Nia hatete, maske ema barak preokupa dehan, reforma fiskal diak, rekola reseitas aas, maibe hatodan emprejariu sira, Setor privadu hanesan parseiru governu tenke kontribui dezenvolve ekonomia hodi fo reseitas ba estadu.

Ami senti katak, reforma fiskal diak, oinsa fasilita setor privadu nasional no internasional halo investimentu, loke kampu servisu ba Timor oan, bele hatama reseitas ba estadu, dudu kresementu ekonomia lao ba oin,’’dehan Nia.

Iha parte Seluk Direitor Jeral Alfandega Jose Antonio Fatima Abilio hatete, pakote reforma fiskal atu halo reforma lei tributaria oinsa fasilita setor privadu nasional no internasional sira halo investimentu iha rai laran ho objetivu bele rekola taxa kontribui ba reseitas domestika.

Nunee mos Deputadu Agustinho Lay Bankada CNRT hatete, emprejariu importa sasan tama iha portu tenke selu taxa aas.

“Hau hanoin reforma fiskal diak, bele fasilita emprejariu sira halo investimentu hodi kria kampu servisu ba Timor oan, no kontribui selu taxa ba estadu,’’dehan Nia. Josefa dos Santos

Suara Timor Lorosae

Dom Virgilio, Husu Kampres 8 Respeita Malu no Prontu Simu Rezultadu

Posted: 27 Feb 2017 03:37 PM PST
DILI – Bibi atan Igreza katolika Timor Leste, liliu Bispu Dioseze Dili, Dom Virgilio do Carmo da Silva, SDB husu ba kampres sira atu respeita malu no pronto simu rezultadu kuandu kandidatura Prezidente Republika la eleitu ba Prezidente Republika.

Deklarasaun nee, fo sai husi Bispu Dioseze Dili, Dom Virgilio do Carmo, SDB liu husi intervista eksklusivu ho STL, hafoin remata vizita husi kanpres Angela, iha Episkopal Dioseze Dili, Lecidere, Kinta (09/02/2017).

Apela no husu ba sira atu halo kampania didiak, respeita malu, koalia didiak ba malu no kontrola militantes sira no simu rejultadu kuandu kanpres balun lakon,”dehan Dom Virgilio.

Bispu Dioseze Dili nuudar bibi atan husu ba kanpres nain 8 atu fo apoia moral ba militantes no simpatizantes atu respeita malu, koalia didiak ba malu, la bele insulta malu no nuudar sarani atu moris tuir valores prinsipiu valores morais husi kreda nian. Tamba nee, kuandu kanpres nain 8 ida nee mak balun lakon karik husu simu rejultadu tamba buat hotu husi povu no povu rasik mak sei hili no ida nee depende ba povu hodi hili kanpres nain 8 ida nee.

Iha fatin ketak, Pe. Paroku Maria Maria Auxiliadora, Pe. Elias de Deus, SDB katak relasiona ho festa demokrasia iha 2017 nuudar sarani no amu paroku husu ba povu Timor tomak liliu ba maluk sarani sira presiza toma atensaun buat rua mak atu sai sarani diak no sidadaun onestu.

Tamba nee, husu ba povu nuudar mos sarani atu kontribui ba sosiedade neebe horik ba hodi bele kontribui ba paz no estabilidade relasiona ho festa demokrasia liliu ba eleisaun Prezidensial neebe komesa iha fulan Marsu no ba Parlamentar Jullu. Domingos Piedade/Timotio Gusmao

Suara Timor Lorosae

Julgamentu ba portugés retidu iha Díli durante tinan rua liu sei hahú iha tersa-feira

Posted: 27 Feb 2017 03:33 PM PST
Julgamentu ba kazal ida ho sidadaun portugés ne’ebé retidu ona iha Timor-Leste durante tinan rua liu, akuzadu pekulatu, brankeamentu kapitál no falsifikasaun dokumental, sei hahú tersa-feira ne’e iha Tribunal Distritál Díli.

Marka ona ba sesaun rua – tuir fali sei iha 14 fulan – marsu – julgamentu ba Tiago no Fong Fong Guerra tenki hahú, ba faze dauhuluk, sei rona testemuña na’in tolu ne’ebé aprezenta hosi Ministériu Públiku.

Sira maka Mónica Rangel diretora jerál dezde 2013 iha Diresaun Jerál Impostos no ba data akontesimentu hirak ne’ebé refere ba kazu ne’e ba diretora nasionál impostu petrolíferu, no ninia responsável direitu, Câncio Oliveira, komissáriu Diresaun Jerál ba Impostu no diretór Alfandega.

Aumneta moos ba arolamentu testemuña akuzasaun maka vise-ministru Finansa, Rui Hanjam, liuhosi julgamentu ne’ebé koletivu juíz sei preside hosi juíza Jacinta da Costa.

Defeza prevé ona atu aprezenta to’o testemuña 12 iha kazu ne’ebé sei hahú hetan akompaña hosi diplomata akreditadu iha Díli, reprezentante instituisaun oioin, inklui Nasoins Unidas no Banku Mundiál, no organizasaun sosiedade sivil timoroan sira.
Tiago Guerra, ne’ebé lakohi halo komentáriu ruma ba agora, sente kedas iha inísiu tinan ne’e – bainhira data arranke julgamentu marka ona- satisfeitu tanbea bele hahú ba desfexu prosesu ida ne’ebé la’o kuaze tinan rua liu ona.

Portugés na’in rua – ne’ebé só iha finál dezembru nian hetan asesu ba prosesu kompletu – hetan akuzadu ba krime pekulatu, brankeamentu kapitál no falsifikasaun dokumental, ne’ebé hamutuk reprezenta pena máxima bele tinan 27.

Iha akuzasaun, MP konsidera argidu responsável ba autoria material ho konkursu real no forma ba krime tolu.

Hanesan prova, aléinde dokumentu sira ne’ebé inklui iha prosesu, MP timoroan aprezenta iha inisiu testemuña haat, inklui eis-vise-ministru Finansa Rui Hanjam, funsionáriu seluk hosi Ministériu Finansa no atuál ministra ba kargu ne’e, Santina Cardoso.

Santina Cardoso ikus mai hasai fila fali hanesan testemuña akuzasaun nian bainhira Ministériu Públiku deside separa prosesu kazal portugés ho koarjidu sira seluk, sidadaun norte-amerikanu Bobby Boye.

Boye hanesan eis-konselleiru hosi setór petrolíferu ne’ebé defrauda Governu timoroan iha outubru 2015, hetan kondenadu hosi tribunál federal norte-amerikanu ba tinan neen kadeia no fó fila osan dólar millaun 3,51 ba Timor-Leste, no agora prezu hela.

Iha prosesu Tiago no Fong Fong Guerra prokuradora defende mantein nafatin ho medida koasaun, ne’ebé to’o agora aplika ” reforsa pressupostu ne’ebé determina iha lei” tuir medida ne’e. Estaun na’in rua labele atu sai hosi nasaun dezde outubru 2014.

Husu moos katak argidu sira hetan kondenadu selu kompensasaun sivil ho valór Estadu timoroan ninia lakon, ho total dólar 859.706,30.

Tiago Guerra no ninia kaben só rona rona hosi MP iha finál nian, liu fulan 20 hafoin detidu, hetan impedidu sai hosi nasaun durante tinan rua liu ona no jo Termu Identidade no Rezidénsia.

Tiago Guerra hetan detidu ba interrogatóriu iha 18 outubru 2014, durante loron tolu iha eskuadra polísia Caicoli no lron 21 funan ne’e rona iha Tribunal Díli, bainhira juiz ordena nia ba prizaun preventiva, tama iha kadeia Becora, to’o 16 fulan juñu tinan kotuk.

Dezde tempu ne’ebá, ho nia kaben, ho Termo Identidade no Rezidénsia (TIR) labele sai hosi nasaun.

SAPO TL ho Lusa

Sosiedade Sivil Konsidera Taur Susesu Programa

Posted: 27 Feb 2017 03:36 AM PST
DILI – Sosiedade sivil Timor Leste konsidera katak, durante mandate tinan lima (5) Prezidente Republika (PR), Taur Matan Ruak nian konsege hetan susesu iha ninia programa.

Tuir Diretor FONGTIL (Forum Organizasaun Naun Governamental Timor Leste), Arsenio Pereirra hatete katak, Prezidente Republika (PR), Taur Matan Ruak hanesan xefe estadu atu garante paz no estabilidade.

Ita haree katak durante tinan 5, ita nia Prezidente da Republika nia halo servisu lubuk ida tuir nia kampania hatete,” dehan Diretor FONGTIL, Arsenio ba STL iha nia knar fatin, Caicoli-Dili, Segunda (27/02/2017).

Diretor FONGTIL haktuir, razaun susesu tanba Taur konsege konklui hotu 442 neebe eziste iha Timor Leste. Ida nee servisu neebe Taur halo durante nee. Diretor FONGTIL argumenta, tinan lima Taur halo servisu lubuk ida neebe halo husi PR no ita hein katak prezidente foun mai nee bele kontinua diak liu tan fali ida nee.

Iha fatin ketak, Deputadu Bankda PD, Paulino Monteiro esplika, durante Taur nia mandate hanesan PR, konsege halo ona programa balun sai susesu no mos balun lasusesu. Deputadu Bankda PD afirma, lolos PR nia vizita nee tenke barak tanba nia ema ida iha nasaun nee, liu husi vizita ba estranjeiru nee hatudu imajen TL ba rai liur.

Entertantu Deputadu Bankada CNRT, Cesar Valente Pilotu konsidera, mandatu PR, Taur durante mandate tinan 5 nee lao diak no kapas tebes ita presiza louva. Cesar afirma, durante nia mandate lao iha situasaun trakulidade, pas no estabilidade too ohin loron, atu tama tan iha festa demokrasia hasoru eleisaun prezidensial no parlamentar. Raimundo S. Fraga

Suara Timor Lorosae

Kanpres Labele Husu Pensaun Vitalisia Ba Estadu

Posted: 27 Feb 2017 03:26 AM PST
DILI – Kandidatu Prezidente Republika iha nain walu, bainhira eleisaun povu hili entre sira nain walu ida sai Prezidente Republika, tenke sai servidor ida neebe maka diak no labele husu pensaun vitalisia ba estadu

Antes tinan 2017 ema hotu hotu protesta makas konaba lei pensaun vitalisia, nunee iha loron sanuluh, fulan Janeiru tinan ida nee, Parlamentu Nasional halo redusaun ba lei no haruka ona ba Prezidente Republika atu promulga.

Maibe bainhira lei nee to iha meja Prezidente Republika, Prezidente denunsia fali lei nee ba Tribunal Rekursu hodi hare ninia inkonstitusionalidade.

Hafoin Tribunal hare tiha lei nee, iha semana kotuk liu ba Tribunal haruka ona karta notifikasaun Lei pensaun vitalisia ba Parlamenu, no iha Tersa (20/02/2017) Parlamentu Nasional resposta ona notifikasaun husi Tribunal Rekursu.

Tuir observador politik Manuel da Silva husu ba kanpres nain walu neebe maka compete iha elisaun mai, bainhira povu hili ida sai Prezidente karik, labele ezije pensaun vitalisia ba estadu, tanba oras nee povu sei moris iha terus no kiak nia laran.

Hau husu ba kanpres nain walu nee, bainhira povu fo fiar sai Prezidente karik, labele kanten husu pensaun vitalisia ba estadu, tanba ita nia povu sira sei moris iha terus no kiak nia laran ,” dehan Manuel ba STL, iha PN, Dili, Segunda (27/02/2017).

Observador politika nee mos haktur tan katak, sai servidor neebe maka diak ba povu, labele hanoin deit ba osan, maibe buka servisu makas par abele hetan osan, tanba povu kiik mos atu hetan osan servisu to dolar didiak maka foin hetan dolar ida ka rua.

Iha parte ketak deputadu bankada Frente Mudansa Jorge da Conceicao Teme hateten, Kandidatu Prezidente sira labele husu vitalisia ba estadu, sira so bele hetan bainhira sai Prezidente I hakotu sira nia mandate, kuandu lei nee promulga maka simu nafatin. Carme Ximenes

Suara Timor Lorosae

ANTONIO KALOHAN OPTIMISTA SEI HETAN KONFIANSA POVU SAI PR

Posted: 27 Feb 2017 03:04 AM PST
Kandidatu Prezidente Republika (PR) ba periodu 2017-2017, Antonio da Conceição “Kalohan” optimista sei hetan votus konfiansa barak liu kompara ho kandidatu nain ualu (7) sira seluk iha eleisaun prezidensial ne’ebe sei hala’o iha loron 20 Marsu tinan ne’e.

“Ha’u ba ho duni konviksaun ida katak, ha’u ba atu manan tanba ha’u la’os konvidadu ba rai ida ne’e. Ba eleisaun segunda volta ninian, ha’u ninia persentajen mak sei bo’ot liu tan fali duke maun Lu-Olo ninian, tantu maun José Luís Guterres, tanba ne’e ha’u mak sei manan iha eleisaun iha tinan ne’e,”argumenta kandidatu PR, Antonio da Conceição “Kalohan” deklara asuntu refere ba Jornalista sira, hafoin partisipa abertura Kongresu Nacional Partido Democrático (PD) ne’ebe hala’o iha Centro de Convenções de Dili (CCD), Sesta (24/02/2017).

Nudar kandidatu PR foun ne’ebe primeira-ves kandidata an ho ninia komprimisiu lori diferensia ida diak liu kandidatu sira seluk, tamba kandidatu hanesan Lu-Olo lakon periodu 2 ona, inklui kandidatu Jose Luis Guterres lakon periodu ida tiha ona.

Hatan konabá kandidatu nain 7 sira lao’s dezafiu ba ninia kandidatu atu hetan vitoria iha eleisaun jeral prezidensial, tamba nia iha apoiantes barak.

“Kandidatu sira seluk ne’e hanesan politiku ida, ha’u nian membru no simpatizantes sira mak hanesan ita haree dadauk e sira hamrik iha ha’u ninia kotuk. Públiku ninia espetativas no esperansa bo’ot ba kandidatu Lu-Olo mak sei manan, tanba lider karismatiku, eis querilleiros independensia, Xanana Gusmão ninia apoiu, maibe Antonio Kalohan, dehan, públiku seidauk dehan buat ida ne’e, públiku ne’e dehan kuandu konfirma iha ninia votu, persepsaun politiku sira nian e sim,! hanoin dehan maun Lu-Olo manan, tanba maun Xanana ba hamrik,.. ida ne’e seidauk garantia, tanba públiku mak determina iha ninia votu mak maun Lu-Olo manan e ita tenke asegura mak ida ne’e,”sublinha Kalohan. Ito

Jornal Nacional Diário

ASANAMI-ANTONIO CONCEIÇÃO LIDERA PD BA PERIODU 2017-2021

Posted: 27 Feb 2017 02:23 AM PST
Kongresu nasional Partido Democratico (PD) ba datoluk hala’o iha Centro de Convencões de Dili (CCD), husi loron durante loron tolu (24 – 26) fulan Fevereiru ne’e rezulta kandidatu Mariano ‘Asanami’ Sabino sai Presidente ho Antonio de Conceição ‘Kalohan’ sai sekretario Jeral Partido Democratico ba tinan 2017 to’o 2021.

Iha Kongresu nee kongresista hamosu pakote kandidatu Prezidente no Sekretáriu Jerál PD hamutuk neén (6), primeiru, José Nominando Martins Buras no Francisco Borlaco, segundu, Constancio Pinto no Mariano “Asanami” Sabino, terseiru, Marcos da Cruz no Jacinto Gusmão, kuartu, Mariano “Asanami” Sabino no António da Conceição, kintu, Mariano ‘Asanami’ Sabino hó António da Conceição no pakote sestu, Júlio Sarmento ‘Meta Malik’ no Mariano Assanami.

Husi kandidatu sira nee pakote ba dahat, kandidatu ‘Asanami’ no Antonio Kalohan manan ho votus 2288 husi total kongresista 3001 nebe mai husi Municipiu 13.

Prezidente PD eleitu, Mariano Asanami Sabino iha ninia hateten, PD to’o ona tempu ba povu, katak PD ne’e povu, jovens no veteranus nian, tanba sira deklara hodi fó kontinuidade mehi erois nian atu konstroi Estadu direitu demokrátiku ida ne’e. No tane aas valor demokrátiku hodi realiza proklamasaun FRETILIN nian iha dia 28 Novembru ne’ebé hanaran Repúblika Demokrátika Timor Leste (RDTL).

“ Ohin hó kongressu ida ne’e, prontu atu hatutan no konstroi i sai esperansa mós ba jerasaun i ba veteranus sira katak, ami prontu ona asumi responsabilidade ba komprimisiu Maubisse um no Maubisse dois ne’ebé mak atu entrega ba jerasaun foun,” dehan Prezidente Partido eleitu Mariano Asanami Sabino ba jornalista sira iha CCD, Segunda (27/02) madrugada

Asanami hateten, PD sempre orgullu hó maun bo’ot sira li-liu Xanana Gusmão ne’ebé uluk deklara hamutuk hó PD, maibé ikus mai tenke harí tan CNRT.

Nia dehan, hanesan maun Marí Alkatiri no Francisco Guterres “Lú-olo”, hakruk nafatin ba sira tanba PD mai husi prinsipiu FRETILIN ninian atu konstroi Estadu direitu demokrátiku ne’ebé proklama iha dia 28 Novembru.

“Hó kongressu ne’ebé mak ha’u ba asumi nu’udar Prezidente partidu, ha’u hakarak sente ha’u nia maun sira sente partidu ne’e sira nian, partidu ne’e la’ós parseiru sira nian i la’ós atu kontra sira. I maun Xanana, Marí, Lú-olo sente ami sira nia jerasaun prontu atu sira nia kritikas,” dehan Asanami.

Entretantu, kongressu ne’e, hetan partisipasaun máximu husi militantes no simpatizantes PD nian husi munisípiu 12 inklui Rejiaun Administrativa Espesial Oe-cusse Ambenu (RAEOA). Hodi reprezenta sira nia munisípiu hodi hili estrutura PD foun ba periodu 2017-2021.Ito

Jornal Nacional Diário

PM RUI: ESTUDANTE MAKA HEROI LIBERTA POVU

Posted: 27 Feb 2017 02:16 AM PST
Primeiru Ministru (PM), Rui Maria de Araújo hatete katak, estudantes mak kombatentes hodi liberta povu, tanba ne’e tenki aproveita oportunidade, estuda didi’ak no prepara-an hodi sai heroi ba povu.

PM Rui Araújo fó sai deklarasaun ne’e, iha nia diskursu, iha seremonia lansamentu Primeiru Ano Letivo Instituto Politéniku Betano (IPB), Kay Rala Xanana, Kinta (23/02), iha Betano Same.

“Ha’u nia liafuan espesiál ba deit estudante sira, ita bo’ot sira iha oportunidade atu prepara-an, didi’ak, atu sai kombatentes libertasaun do povu. Kombatentes da patria sira hatudu ona dalan mai ita durante 24 anos, sira la liu husi Universidade, sira la liu husi institutu, maibé sira dedika sira nia-an tomak atu liberta pátria. Agora ita nia tempu, liu-liu joven sira hahú kedas husi ensinu báziku sa’e to’o superior, ita hotu nia responsabilidade atu prepara-an didi’ak, nune’e iha 2030, ita bo’ot sira mós bele reklama títulu kombatentes libertasaun do povu,” hatete Rui Maria Araújo.

Eis Ministru Saude iha Primeiru Governu Konstitusionál ne’e hatutan tan katak, atu serbisu ba libertasaun do povu la’os fasil, tenki estuda maka’as.

“Tenki kadi maka’as tebes imi nia kakutak, imi nia koriozidade atu aprende. La’os deit ne’e, aprende tiha hotu tenki buka aplika buat ne’ebé imi aprende. Kursu ne’ebé imi sei tuir sei la fasilita imi atu serbisu iha eskritóriu, gabinete sira. Kursu ne’ebé imi tuir sei prepara imi atu dada imi nia kamiza nia liman, hisik kosar serbisu maka’as, ba área produsaun animal. Produz animal saida? la’os produz lafaek, maibé produz ayam potong ne’ebé sei importa, produz manutolun ne’ebé sei importa, produz na’an karau, fahi, bibi ne’ebé sei importa iha supermerkadu sira”, Xefi Governu ne’e esplika.

Alénde tenik Rui Araújo, “ba konstrusaun sivil, imi nia preparasaun la’os atu sai enjineiru, atu hotu-hotu serbisu iha gabinete ka eskritóriu, imi nia serbisu atu sai pedreiru, karpinteiru, fiskalizadores ba óbras sira, hodi nune’e, estrada ne’ebé husi Flexa tun to’o Same imi bele fiskaliza didi’ak i be labele lori arbiru bainhira udan tau rai. Ida ne’e mak ita bo’ot sira nia preparasaun, prepara-an atu serbisu, prepara-an atu hisik kosar,” Xefi Governu ne’e hatete.

Rui Araújo reforsa katak, apelu ne’e la’os deit ba estudante sira iha Same, maibé ba mós estudantes hotu iha territóriu Timor Leste (TL).

“Apelu ne’e mós ba estudante sira hotu iha Timor laran tomak hahú husi ensinu báziku to’o superior, katak prosesu dezenvolvimentu ba Timor-Leste ninian hodi liberta ita nia povu sei naruk, ita bo’ot sira iha oportunidade atu prepara-an didi’ak, atu sai heroi foun tinan 20, tinan 30. Ita bo’ot sira maka sei sai heroi foun atu dudu prosesu dezenvolvimentu iha ita nia rain, tanba ne’e estuda agora labele hanoin deit atu tama universidade atu hetan gelar, dotor, enjineiru, maibé tenki aprende téknikas importantes ne’ebé presiza utiliza iha dezenvolvimentu ita nia rain”, katak Primeiru Ministru.

Iha okaziaun ne’e, PM mós fó parabens ba estudante IPB ba primeiru ano letivu hamutuk atu rua ualu nulu resin tolu (283), ne’ebé husik hela sira nia Munisípiu, hodi ba hili ona eskola iha Institutu Politékniku Betano, Kay Rala Xanana Gusmão.

Segundu fó parabens ba ekipa instaladora ho Ministériu Edukasaun tomak ne’ebé serbisu maka’as tebes ne’ebé halo mehi ida ne’e sai realidade.

“Ita hatene la’os fasil, ita hatene presiza esforsu lubuk bo’ot tebes ida, atu bele ohin ita to’o iha ne’e halo lansamentu ba primeiru anu letivu 2017 Institutu Públiku Betano Kay Rala Xanana Gusmão ne’e,” Nia dehan.

Iha parte seluk, PM Rui hatete, hodi Governu nia naran husu ba autoridade lokal Suku Betano no komunidade tomak atu nafatin haree estudante sira ne’e hanesan imi nia oan rasik.

“Husu nafatin imi iha Betano atu haree estudante sira hanesan imi nia oan rasik, loke nafatin imi nia odamatan, loke ita bo’ot sira nia ospitalidade ba ita nia oan sira hamutuk 283 foti desizaun hodi mai eskola iha fatin ida ne’e. Sira nia luta sei naruk, durante tinan tolu nia laran, atu simu ita nia oan sira hanesan uluk tempu rezisténsia ita nia gerilleiru sira, fó han sira tanba sira maka sei prepara libertasaun povu Timor-Leste nian,” PM Rui hatete.

Iha seremonia lansamentu primeiru anu letivu IPB 2017, ne’ebé lansa husi Primeiru Ministru (PM), Prezidenti Parlamentu Nasional, Vise Prezidenti PN, Ministru Estadu Kordenador ba asuntus Sosiais no Ministru Edukasaun, akompaiña husi Vise Minstru no Vise Ministra Edukasaun, Primeira Dama Isabel Fereira, korpu diplomátiku sira, Reitor UNTL, autoridade Munisípiu Manufahi, estudantes, inan aman no komunidade sira iha área Postu Administrativu Same nian.des

Jornal Nacional Diário

PN DISKUTI ONA LEI ARTISTA TL, KOPIA MÚZIKA EMA NIAN HETAN KASTIGU

Posted: 27 Feb 2017 02:10 AM PST
Parlamentu Nasionál (PN), dada’uk nee hamutuk ho Asosiasaun artista Timor Leste diskuti hela lei artista nian hodi regula múzika husi artista hotu iha Timor Leste.

Xefi Delegasaun Asosiasaun Artista Timor Leste, João Minta, informa katak, sira agradese tebes, tanba Parlamentu bele hamosu ona lei ida kona ba artista sira iha Timor Leste.

“Ami mai Parlamentu Nasionál, tanba iha esbosu lei ida, ne’ebé mak Parlamentu Nasionál mak kria rasik lei ne’e ba artista Timor Leste sira,” informa João Minta ba jornalista sira iha Parlamentu Nasionál (15/02).

Nia haktuir, sira reprezenta asosiasaun Armamor ka asosiasaun músika Timor Leste nian, ba hasoru malu ho deputadu sira hodi husu atu diskuti lalais lei ne’e, tanba durante ne’e, artista sira sai vítima ba múzika ne’e rasik, no artista barak mak sai penonton iha nia uma rasik.

“Asosiasaun iha maibé lei laiha atu bele regula, entaun ami mai ne’e atu hatudu ba Parlamentu Nasionál katak, artista Timor Leste se iha,” relata João Minta.

Nia hatutan, lei ne’e define kona ba buat barak, pintura, fotografer, televizaun, kultura no musíka.

“Lei ne’e define kona ba direitu autor muzíka, labele falsifika ka foti fali ema nia gravasaun halo fali tau ema ida nia naran,” relata João Minta.

Nia relata, sira hasoru hotu ona bankada Parlamentar hat iha Parlamentu Nasionál (CNRT, FRETILIN, PD no FRENTI MUDANÇA) hodi ko’alia kona ba sira nia preokupasaun ne’e, tanba sira mak sei fó atu dudu lei ne’e ba diskuti iha plenária.

Alende ne’e, reprezentante artista Timor Leste, Alex Samurai primeiru mós hateten katak, lei ne’e importante tebes, tanba durante ne’e, Timor Leste seida’uk iha lei atu regula kona ba artista nian.

“Ida ne’ e foin primeiraves, atu nune’e asegura ita nia maluk sira ne’ebé mak iha talentu kona ba múzika,” dehan Alex.

Nia hatutan, kuandu lei laiha, entaun difikulta artista sira hotu atu hakat ba oin, no hatudu sira nia talentu kona ba múzika nian.

“Agora ita atu ba kanta iha seremonia ruma, kontra mai ita ne’e mínimu liu, depois kuandau kontrata fali ema husi nasaun seluk mai kanta fali iha ita nia rai, li-liu mai kanta iha selebrasaun loron independensia ne’e, kontratu ne’e osan bo’ot,” kestiona Alex Samurai, nu’udar mos membru PNTL ne’e.

Nia haktuir, tuir lolos seremonia sira hanesan ne’e, Timor oan sira mak tenki kanta duni, tanba loron independensia ne’e, loron especial ba Timor oan sira. Nasaun seluk kuandu selebra sira nia loron independensia ne’e, nunka atu konvida Timor oan sira ba kanta, maibé Estadu Timor Leste, konvida fali ema husi nasaun seluk mai katan iha loron especial sira hanesan ne’e.

“Ne’e ita hamate lalaok múzika iha Timor Leste, tanba ita ko’alia agora ne’e la’os ba ohin de’it, sira ne’ebé mak atu mai iha futuru ne’e, labele sai vítima hanesan ami sira ne’e,” salienta nia.

Alex dehan, nia orgullu tebes ba Parlamentu Nasionál nia esforsu servisu durante ne’e, hodi hamosu ona lei atu regula artista Timor oan sira.

“Iha nasaun hot-hotu, kuandu lei iha ona, se de’it mak halo manipulasaun ka copy ba ema nia direitu autor ka hak cipta, ema rona nia múzia ne’e ema kanta atu hetan fali osan, ita sei kondena nia ba tribunal tuir lei ne’e,” relata Aex Samurai.cos

Jornal Nacional Diário
You are subscribed to email updates from TIMOR AGORA.
To stop receiving these emails, you may unsubscribe now. Email delivery powered by Google
Google Inc., 1600 Amphitheatre Parkway, Mountain View, CA 94043, United States

Please follow and like us:
error